Rivadulla descubriu os segredos do cerebro

Da man de Barbantia, o neurocientífico presentou «A que cheiran as cores?»


A xulgar pola elevada afluencia de público que acudiu ao Cine Elma, había unha gran expectación ante a presentación do libro A que cheiran as cores?, anunciado como unha guía para coñecer o cerebro. O seu autor, o neurocientífico e divulgador pobrense Juan Casto Rivadulla, encargouse de colmar sobradamente as perspectivas do respectable que encheu o patio de butacas cunha intervención na que interactuou cos asistentes.

No acto, incluído na programación mensual da Asociación Cultural Barbantia e organizado en colaboración coa editorial Galaxia e a Concellería de Cultura da Pobra, o autor estivo moi arroupado. Abriu a rolda de intervencións dando a benvida a concelleira Patricia Lojo, e cedeulle a palabra a Cipriano Pose, quen puxo en valor o esforzo realizado para que o suplemento A Voz de Barbantia teña continuidade a pesares da complicada situación provocada polo coronavirus.

Outro socio de Barbantia, o psiquiatra e poeta Fidel Vidal, introduciu o tema que trata o libro obxecto da presentación facendo un ameno repaso sobre a presenza da clínica na literatura, e subliñou a capacidade do autor de A que cheiran as cores? para divulgar conceptos complexos de forma sinxela e entretida.

Gran capacidade

Tamén participou Araceli García Pose, pediatra na área de urxencias do Complexo Hospitalario Universitario da Coruña, para destacar a capacidade do cerebro para inculcar habilidades nos nenos.

Xa metidos en materia, tomou a palabra Juan Casto Rivadulla, que no canto de falar do libro que tiñan os poñentes sobre a mesa fixo unha amena presentación durante a que puido participar o público para explicar a complexidade do cerebro derrubando algunhas ideas erradas: «O esencial das neuronas non é o seu número, senón as interconexións entre elas».

Trala entretida exposición de Rivadulla, apoiada en material audiovisual proxectado nunha pantalla, pechou o acto o alcalde pobrense, Xosé Lois Piñeiro, quen asegurou que A que cheiran as cores?, libro que está ilustrado por Nuria Díaz, chegará a todas as escolas e bibliotecas do municipio.

A presentación no teatro Elma contou ao principio e ao remate coa actuación dos alumnos da Escola de Música da Pobra.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Rivadulla descubriu os segredos do cerebro