Pontón promete en Ribeira situar o sector pesqueiro como unha prioridade estratéxica

A líder nacionalista apela a unha gran mobilización o 12, asegurando que «hai partido»


ribeira / la voz

Exercer as competencias sobre o litoral galego, impulsar o saneamento integral das rías e mellorar a cadea de comercialización dos produtos do mar para xerar máis valor engadido son algúns dos compromisos que adquiriu en Ribeira a candidata do BNG á presidencia da Xunta, Ana Pontón, despois de situar o sector pesqueiro como unha prioridade estratéxica para o seu partido. Engadiu que o primeiro paso será poñer fin ao desatino que supón que «as grandes decisións sobre o noso mar e a nosa costa se tomen desde un despacho de Madrid».

A líder nacionalista explicou tamén que o BNG defende a transferencia da competencia sobre navegación marítima, inspección de buques e salvamento, así como a dos portos de interese xeral. Como unha das liñas de traballo prioritarias, avanzou a consecución dun reparto de cotas que deixe de discriminar á flota galega: «Somos unha potencia pesqueira e o meu compromiso é liderar un goberno aliado dun sector que xera miles de empregos».

Para poder levar adiante estas e outras pretensións enmarcadas nun «proxecto solvente, serio, con ideas e autocentrado», Ana Pontón apelou a unha gran mobilización o vindeiro domingo: «Non se pode perder nin un só voto, se nos mobilizamos haberá un cambio real que nos permitirá empezar a construír unha Galicia con futuro, na que poder vivir e traballar con benestar social».

Optimismo

Ao longo da súa intervención no Malecón da cidade ribeirense, a candidata nacionalista á presidencia da Xunta amosouse optimista de cara aos resultados electorais: «Hai partido e saímos a gañalo». Para iso, instou a sumar no Bloque «todo o voto inconformista, o voto da ilusión e da esperanza para que o 12 de xullo celebremos que deixamos atrás a decadencia da Galicia minguante, legado do candidato do PP, para dar paso a un país próspero, moderno e produtivo».

O mitin contou coa presenza do cabeza de lista pola Coruña, Xosé Luís Rivas, que defendeu os servizos públicos e os servizos sociais, destacando o empeño do BNG por reverter os recortes e as privatizacións: «Sempre demos a batalla pola sanidade, pero se algo nos ensinou o covid é que un sistema público de saúde é clave».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
67 votos
Comentarios

Pontón promete en Ribeira situar o sector pesqueiro como unha prioridade estratéxica