Ánxela Franco uniu ás súas dúas familias no seu cabodano

A crise sanitaria obrigou a reducir a unha cerimonia íntima o que ía ser unha gran homenaxe á política sonense


Noia / La Voz

Hai un ano, a nova da morte de Ánxela Franco fixo tremer os cimentos do nacionalismo galego. Íase un piar do BNG na comarca, así que con motivo do aniversario a formación política estaba a organizar unha gran homenaxe no seu recordo. A crise sanitaria impediu que ese acto puidera levarse a cabo, pero non que as persoas que a querían tiveran a ocasión de lembrala. As súas dúas familias, a de verdade e a política, uníronse onte nunha íntima e sentida cerimonia arredor dunha muller «loitadora, valente, entregada e moi boa amiga».

Na igrexa de Caamaño celebrouse unha cerimonia polo seu cabodano e acto seguido tivo lugar unha pequena homenaxe no cemiterio cunha ofrenda floral. Tamén soaron os acordes do himno do antigo reino de Galicia e Balbino González, que colleu o relevo de Franco á fronte do BNG de Porto do Son, fixo unha breve intervención para lembrar á súa compañeira, de quen dixo que, se non chegou máis lonxe en política, «foi pola súa honestidade, pola súa sinceridade, ía sempre de fronte coa verdade por diante, e iso non sempre gusta». E engadiu que foi emocionante e bonito atoparse coa familia de Ánxela, «porque nós somos a súa segunda familia».

Co himno galego pechouse o acto coa mirada posta xa en recuperar o vindeiro ano esa gran homenaxe que esta vez non se puido celebrar.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
31 votos
Comentarios

Ánxela Franco uniu ás súas dúas familias no seu cabodano