ribeira / la voz

Como vén ocorrendo desde hai xa varios anos, o BNG celebrou o arranque do curso político en Rianxo, coincidindo co 70 cabodano de Castelao. Pero, nesta ocasión, a formación chegou á vila barbancesa con ánimos renovados. Un dos motivos, o regreso do Bloque ao Congreso: «Galicia volve a estar presente no debate político; do que non se fala, non existe, e hoxe Galicia existe», sinalou Ana Pontón, que acaba de ser proclamada candidata ás vindeiras eleccións autonómicas. O outro, o cambio político que segundo a líder nacionalista se empeza a ver en Galicia: «O BNG ten que levar o temón do próximo goberno da Xunta».

Coa presenza entre o público do deputado nacionalista en Madrid, Néstor Rego, a portavoz nacional fixo referencia ao acordo de investidura asinado co PSOE, apuntando que se trata dun «acordo histórico para Galicia que deixa espido a Feijoo, pois o Bloque conseguiu máis nun mes que el en dez anos desde a Xunta». Dos puntos dese acordo destacou o abaratamento das peaxes da AP-9, o incremento dos recursos para as persoas dependentes, as melloras para os emigrantes retornados, o compromiso para sanear as rías e o aumento dos medios para a loita contra a violencia de xénero.

Do mesmo xeito, Ana Pontón avanzou os que serán os puntos clave do programa do BNG de cara ás vindeiras eleccións autonómicas e que pasan por conseguir un prezo xusto para a enerxía eléctrica, plantarlle cara ao modelo europeo sobre a pesca, rexeitar a mina de Touro e cambiar a política forestal: «Non podemos seguir vendo como se hipoteca o futuro por unha empresa como Ence. Non pararemos ata que saia da ría de Pontevedra».

Unha axenda «petada»

O BNG encomendouse en Rianxo a Castelao, definido polo rexedor local, Adolfo Muíños, coma «o noso principio e o noso fin», para cumprir e facer cumprir esa axenda galega, una axenda «petada», como dixo o alcalde, «despois de anos de silencio de deputados que exerceron de procesión dos caladiños». A Néstor Rego, ao que se dirixiu como un seguidor da estela de Castelao, pediulle que loite para que en Madrid entendan a existencia en Galicia dunha realidade económica diferente: «Non pedimos subvención, senón que nos deixen traballar, que nos deixen pescar».

Tamén falou Muíños da necesidade de pelexar para corrixir o desfase que existe entre os fondos que perciben os concellos: «Os galegos reciben 50 euros por habitante menos que os concellos do resto do estado». E avogou por deixar que Castelao siga exercendo de guía, para tomar como exemplo del «o compromiso ético, o servizo ao pobo e a defensa do noso idioma».

O acto incluíu unha ofrenda floral no busto de Castelao situado no paseo da Ribeira.

Adolfo Muíños pídelle á Xunta que abandeire o proceso para recuperar a vivenda do escritor

Os actos que onte se levaron a cabo en Rianxo para renderlle homenaxe a Castelao comezaron cunha ruta por recunchos da vila vinculados ao escritor, na que exerceu de guía o propio alcalde, Adolfo Muíños. Despois de percorrer A Praciña, o edificio no que o galeguista residiu coas súas irmás ou o monumento A Manuela, o grupo chegou á rúa de Abaixo: «Un espazo que é o tótem da literatura galega», como dixo o rexedor, pois nun tramo de cen metros están as casas de Dieste, Manuel Antonio e Castelao. Muíños aproveitou para poñer enriba da mesa unha xa vella reivindicación: «A Xunta debería abandeirar o proceso de recuperación da vivenda de Castelao».

Houbo tamén unha parada no restaurante Feliciano, o primeiro lugar da vila no que soou Ondiñas da nosa ría, a canción que foi o xermolo da Rianxeira e que un coro lle dedicou a Castelao en Bos Aires.

O percorrido finalizou na praza Rafael Dieste, o terreo de xogo do escritor na nenez e onde se atopa ademais a biblioteca municipal que leva o seu nome, no señorial pazo do Martelo. Alí, da man dos Quinquilláns, os presentes gozaron dunha pequena representación teatral sobre a emigración.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
126 votos
Comentarios

O BNG encoméndase a Castelao para liderar o cambio político en Galicia