Antón Riveiro Coello: «Interésanme os temas que fan pensar, aínda que supoña un proceso doloroso»

O escritor de Xinzo gañou recentemente o Torrente Ballester, que suma a unha longa lista de premios literarios


Ribeira / la voz

Antón Riveiro Coello (Xinzo de Limia, 1964) é un dos escritores galegos máis recoñecidos e de maior éxito na actualidade. O autor, afincado en Barbanza, acaba de gañar o Premio de Narrativa Torrente Ballester, que concede a Deputación da Coruña, coa súa obra O paraíso dos inocentes.

-O seu nome uniuse recentemente á lista de premiados co Torrente Ballester, que supón acadar este galardón?

-É unha alegría. Xa fai 20 anos que non me presentaba a un certame deste tipo, aínda que me deron máis premios sobre obras publicadas. Do Torrente Ballester xa fora finalista e non gañara por un só voto. Naquel momento foi importante para min, porque estaba comezando a miña carreira e tiven a todas as editoriais detrás. Nesta ocasión decidín probar e estou contento.

-De «O paraíso dos inocentes», o xurado destacou que está apegada a realidade social. En que baseou a novela?

-O libro naceu en marzo do 2016, cando fun a Bruxelas a visitar á miña filla pequena. Catro horas despois de estar no aeroporto produciuse o atentado terrorista. Fíxome reflexionar e impresionoume moito a consternación que se vivía na cidade. Emparello esa historia coa guerra de Siria, concretamente na cidade de Alepo, que estaba dividida en dúas. Por un lado o bando do réxime e por outro, o rebelde. Contactei cun refuxiado que chegou a Europa e contoume a súa historia, que era terrible. Un home que traballaba como químico e cando lle chegou a notificación para participar na guerra decidiu fuxir. E tamén expoño a visión dunha xornalista que informa do conflito desde dentro. As historias acaban confluíndo, e trato de expresar como a guerra causa nas persoas uns efectos devastadores.

-Coñecer de primeira man a historia dun refuxiado será duro.

-É doloroso. Hoxe en día, a xente utiliza a ficción como vía de escape da realidade. Antes, as artes facían reflexionar sobre os problemas do ser humano. A min interésanme os temas que fan pensar, aínda que supoña un proceso doloroso. Non digo que quedase farto da guerra, pero si afectado porque hai persoas que o perderon todo.

-Como é o seu proceso creativo?

-Hai un punto de partida, como puideron ser os atentados en Bruxelas. Despois chega o momento de documentarse e ler moitos libros e pásase á parte máis interesante, cando te pos a traballar sobre o papel e atopas xente que conta a súa historia de primeira man. Logo tamén son importantes a imaxinación e a intuición para disfrazar o relato para chegar a outros puntos. Pártese dunha base real, e o que importa é que a historia sexa verosímil.

-Na súa xuventude foi guitarrista nun grupo de rock, iso está reflectido nos seus libros?

-En case todas as miñas novelas a música ten importancia, sempre hai alguén relacionado con ela. Creo que escribo porque non tiven a sorte de nacer nunha cidade con conservatorio. Eu tocaba de oído e xuntabámonos uns amigos para tocar. Dedícolle case tanto á musica como á escrita. Teño cancións compostas, aínda que o fago para min. Encántame tocar a guitarra e tense que notar esa vena creativa na miña obra.

-Vostede goza do recoñecemento dos seus compañeiros de profesión, iso é máis reconfortante que os propios premios?

-Os escritores non competimos entre nós, facémolo, en todo caso, contra nós mesmos. Pensar que hai persoas que se dedican ao mesmo que ti e que lles gusta o que escribes é satisfactorio. Escribimos para lectores, aos que non lles coñecemos o rostro, e non sabes o que opinan, por iso a valoración que fan os colegas ten un dobre valor.

«O que máis me impresionou de Barbanza foi a xente»

A pesar de ser natural de Xinzo da Limia, Antón Riveiro Coello é xa un barbancés máis. Instalado en Boiro, o escritor está moi implicado na vida da comarca, sobre todo no eido cultural.

-Agora xa é un veciño máis, pero que lle namorou desta comarca cando chegou a ela?

-O que máis me impresionou de Barbanza foi a xente, o seu carácter. Igual no interior de Galicia somos máis introvertidos, pero aquí a xente vive na rúa. Incluso en decembro as terrazas están cheas e parecíame extraordinario. Tamén que os veciños da comarca van de fronte e son sinceros. Agora é o que máis valoro. E despois, por suposto, a paisaxe. Por sorte Barbanza aínda non está moi explotada e ten paraxes naturais fantásticos.

-Como ve aquí a produción cultural na actualidade?

-Esta comarca ten a capacidade dunha cidade de 120.000 habitantes, xa que as distancias entre localidades non son moi longas. Decateime da cantidade de xente creativa que hai e non tiña contacto. Barbantia serviu para poñelos en contacto e para poñer en común proxectos. Hai moitas persoas publicando e outras moitas que están aí. Aquí vive moita xente con talento e ganas de escribir e hai que buscarlle un sitio a todo o mundo. Barbanza é unha potencia artística, algo que non ocorre noutros lugares. Ademais, podemos exportar porque temos de todo. É unha zona por descubrir para o resto de Galicia.

-E como dixo, para axudar nese labor de difusión e posta en valor da cultura está Barbantia.

-Este colectivo é un bo exemplo de que a sociedade civil pode organizarse para ofrecer cousas que, ás veces, os concellos ou outras asociacións non ofrecen. O asociacionismo é unha plataforma para os escritores, para fomentar que continúen escribindo ou para mover as obras. É unha correa de transmisión entre nós. Cando naceu era raro ver presentacións de libros na comarca e agora hai fins de semana nas que se celebran cinco ou seis.

-Aínda que xa é un barbancés máis, non se esquece das súas raíces. Como senta que en Xinzo o nomeasen fillo predilecto?

-É unha honra, a pesar de que me dá algo de vergoña estar, por exemplo, bailando detrás das charangas no entroido e ver a placa que indica a casa na que nacín. Faime ilusión, por suposto. Ademais, creo que só a condesa de Fenosa e máis eu somos fillos predilectos de dous concellos, xa que tamén me deron esa distinción en Baltar, de onde eran meus avós.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
4 votos
Comentarios

Antón Riveiro Coello: «Interésanme os temas que fan pensar, aínda que supoña un proceso doloroso»