Isma Kalo: «Estudo serbocroata para interpretar música balcánica»

Vén de gañar o certame musical da Deputación coa canción «A quen lle importa»


Isma Kalo é o nome artístico de Laura Marín, unha rapaza de Baroña que é unha apaixonada da música balcánica. A quen lle importa? é a súa primeira composición en galego e con ela vén de gañar o concurso Quero Cantar da Deputación da Coruña.

-A quen ía dirixido o tema gañador do certame?

-É case unha canción autobiográfica. Fala da miña vida. Penso que nos centramos en cousas que realmente non teñen importancia, como o noso aspecto ou no que a xente pensa de nós.

-Co seu nome artístico xoga a propósito coa ambigüidade?

-Son unha persoa moi andróxina. Ata hai nada, a xente preguntábame se era un rapaz ou unha rapaza. E a quen lle importa, se todos os rapaces somos iguais.

-«A quen lle importa o teu xénero, a túa identidade», canta.

-É que nunca me rexín polos estándares do que é un home ou unha muller. Sempre fun unha persoa diversa.

-Tamén no musical?

-Si, claro. Para que quedarme unicamente co rock ou coa música do Balcáns cando podo telo todo?

-De onde lle vén o seu interese pola cultura balcánica?

-Descubrín o idioma serbocroata cando era moi rapaza, cun programa que se chamaba El oso de la casa azul. Eu tiña 9 anos. Agora estudo serbocroata para poder interpretar a música balcánica.

-Sería a raíña da clase...

-Sempre me sentín un pouco así, porque con 6 anos o meu grupo favorito era Simply Red. Tamén me gustaban Mecano ou Phil Collins. Pero nunca sentín que fose algo malo ter gustos únicos. Empecei a percibir iso logo.

-O dos Balcáns non creo que poida compartilo con moita xente, desde logo.

-Seino. Á miña nai fálolle todo o tempo dos Balcáns. A pobre escóitame porque é a miña nai, pero non entende nada. [Ri]

-No teatro Colón cantou: «Que si teño gustos raros / Non teño nin idea de política / Non sei o que me pasa nin o que me ten que pasar». Farta de etiquetas?

-Interésame moito a política, a de aquí e a de alá, a antiga Iugoslavia, o conflito de Kosovo... É un tema moi importante, gústame analizala, pero intento buscar fontes e vexo que é todo moi confuso. Dáme rabia ter 15 anos, estou a punto de poder votar e non me sinto totalmente informada.

-Aínda así, ten bastantes cousas claras para a súa idade.

-Con Internet, quen non sabe algo é porque non quere. Cando non estou coas matemáticas, estudo serbocroata ou vexo un documental.

-Pois na canción fala dun suspenso en Bioloxía...

-Foi en matemáticas, pero non quedaba ben na letra [ri]. Este trimestre si que as saquei!

-Por que se presentou ao concurso da Deputación?

-Lendo a biografía dun dos meus cantantes favoritos de Macedonia vin que con 15 anos participou nun concurso de música, gañou e a súa carreira disparouse.

-Que plans ten agora?

-Quero estudar filoloxía eslava e buscar unha oportunidade en Serbia ou por alá.

-Dicía na canción que ten morriña do mar, cal é o seu?

-Aínda que nacín na Coruña, eu son de Baroña. Co mar sempre tiven unha atracción especial. Vivín en diferentes casas, pero o mar sempre estaba alí.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Isma Kalo: «Estudo serbocroata para interpretar música balcánica»