Sen representación política en Madrid


Écomplicado camiñar polas corredoiras da Barbanza sen que te encontres a un afiliado do PP laiándose dos malos resultados deste pasado domingo. Todos coinciden en que a fuxida do centro protagonizada por Casado expulsounos dun hemiciclo onde noutrora imperaban. O segundo aserto é: «Pero isto non se debe extrapolar ás municipais». Velaí o sentimento de rexeneración. Están purgando o pecado, pero á súa vez, reafírmanse no labor realizado nos concellos polos seus alcaldes, cidadáns normais, próximos aos seus veciños, lonxe do lume fatuo proxectado por Compostela e Madrid, as dúas capitais onde os seus estrategos non coñecen a realidade do día a día.

Vexamos as realidades: o ascenso do PSOE nos nosos concellos é contundente. Vox non entrou. Ciudadanos sitúase entre a terceira e cuarta forza nos concellos, alternándose con En Común. En Marea non está. O Bloque fica ás portas da Carreira de San Jerónimo sen conseguir de novo representación. Non se contenta quen non quere. Din que está subindo. Agardaban que o boirense e vello profesor Xosé Deira estivese no Senado, mais non puido ser. Os 44.250 votos non foron dabondo para dispor dun home íntegro e comprometido coa súa terra na Cámara Alta. A fragmentación das forzas da esquerda é a culpable destas derivas. O mesmo que a fragmentación da dereita provoca esta situación que permite ao PSOE, sen facer grandes esforzos, gañar unhas eleccións adoptando un perfil baixo.

A realidade: ningunha formación conta con representación en Madrid dos concellos de Barbanza, Noia, Muros e Mazaricos. Unha das áreas máis poboadas de Galicia non terá voces que se fagan escoitar nos foros onde se toman as decisións que nos afectan: nos propios partidos, no Congreso dos Deputados e no Senado.

Isto calquera con dous dedos de fronte debería facerse miralo. Empezando por Feijoo. A ditadura das listas pechadas ten estas cousas. E o papanatismo dos afiliados axuda.

Si quen asina esta crónica exercera como alcalde do PP de Boiro, Porto do Son e Ribeira estaría preocupado e manifestaría o mesmo que Santiago Freire, rexedor de Noia, antes de Lousame: «Os resultados non son para afrontar as municipais confiados e con tranquilidade». A súa ampla experiencia política e de xestor do público debería actuar como unha chamada ás barricadas para reconducir as estratexias fronte ás divisións que lles afectan. O mesmo que os partidos da esquerda.

Pero, xa se sabe que non hai peor cuña que a da propia madeira. En Ribeira, Torres Colomer non acepta pechar a lista do PP, o que manifesta, unha vez máis, pero xa publicamente, a súa desafección con Ruiz Rivas. Vicente Mariño de Bricio, líder do PBBI, a estas alturas e cunha lista confeccionada con ex do PP, non contempla outra alternativa que ser alcalde en lugar do actual. Si se presentan Vox e Ciudadanos, logo de ver a estratexia do PSOE, o conseguirá; se non ao tempo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Sen representación política en Madrid