Cromos repetidos


Gardamos da infancia o recordo claro de que non nos gustaban os cromos repetidos. Pediámoslles aos nosos pais que nos comprasen máis sobres ansiando cromos novos. E, ao final, cando xa perdiamos a esperanza, mandabamos unha carta pedindo os que nos faltaban, e agardabámolos con ansiedade. Non vou contar como me sentía cando chegaban. É unha experiencia tan universal que é innecesario e, por riba, as palabras debilitaríana.

Aínda así, creo que ese tipo de recordos mal interpretan a infancia como un lugar de busca de novidades. Somos os adultos os que proxectamos nos recordos esa ansiedade. A infancia queda mellor reflectida nese hábito que, debido á miña mala memoria, non recordo, pero que si experimentei marabillado cos meus sobriños. Refírome a como desfrutaban vendo a mesma película ou lendo o mesmo libro ou escoitando a mesma historia. Que pesados se puñan: «Cóntamo outra vez» ou «ponma outra vez», protestaban cando ti lles querías impor outra historia ou outra película, convencido de que é moi importante para eles ter experiencias novas. Pois non. Eles, co que realmente desfrutan é coas historias repetidas, sabendo de antemán qué vai pasar e, o máis importante, que lles vai gustar.

O outro día escoitei unha charla dun mestre que dicía ter aprendido moito dos nenos, e exemplificábao con anécdotas que intentaban revelar que os nenos razoan de forma distinta. Recordou que unha vez lle pediu a un alumno que lle dixese tres froitas. O neno, demostrando o amor que teñen pola repetición, respondeulle tres melocotóns, pero el, dominado pola fobia adulta aos cromos repetidos, explicoulle que tres melocotóns non eran tres froitas distintas, e que a resposta correcta sería, por exemplo: Melocotóns, peras e mazás. O neno demostroulle dous días despois que o entendera resolvendo un problema que viña no libro: «Nunha cesta hai tres melocotóns e dúas peras, cantas froitas hai?». Dúas, dixo. E entón o mestre deuse conta, creo eu, de que a resposta correcta á primeira pregunta non era a súa, senón a do neno. Sen dúbida ningunha, tres melocotóns son tres froitas distintas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Tags
Comentarios

Cromos repetidos