Se é vostede lector usual deste xornal, de seguro que se terá decatado de que houbo un cambio significativo nas últimas páxinas do mesmo. Hai uns meses finou o senlleiro debuxante Laplace, autor das viñetas dos oito erros que todos e todas temos feito algunha vez. O meu avó paterno era un fervoroso devoto de Laplace: non sacaba un pé fóra da casa sen atopar ese oitavo erro un chisco máis complicado que o resto.
O que non podería imaxinar eu hai apenas un ano é que o relevo deste titán de estilo xeométrico o collería un benquerido camarada deste que perpetra liña tras liña, luns tras luns: Fran López, coñecido coma Fechán.
As dotes artísticas de Fran non son ningún segredo para quen o coñece. Non en balde, xa de ben pícaro, tivo os arrestos de coller as súas creacións en plastilina e presentarllas a toda a Península naquel programa que conducía Jesús Vázquez chamado Hablando se entiende la basca. O sentido do ridículo nunca foi un atranco para el.
As súas dotes para o debuxo, a caricatura e a modelaxe son cousa de familia, mais Fechán fixo deste don un estilo de vida, moitas veces con toques anárquicos e disolutos como corresponde a moitos dos xenios do pincel, pero madurando e perfeccionando co tempo un estilo totalmente característico e recoñecible.
Agora poderemos gozar día tras día dese estilo nos oito erros. Pode que alguén bote de menos a Laplace tras tantas décadas de viñetas, mais créanme se lles digo que algún día, oxalá moi distante, botaremos de menos a Fechán.
Ata entón toca buscar ese oitavo erro, vexamos como se nos dá hoxe.