Ausencias


Sucedeu esta Noiteboa, á tardiña, aló polas oito e media do serán, na Pobra do Caramiñal, pero estou convencido de que esta estampa se repetiu en centos de vilas e aldeas do país. Os bares da rúa de Unión e da praza de Maura estaban ateigados de xente nova, un feixe de persoas que tiñan entre 20 e 40 anos, que se atopaban cos seus amigos de toda a vida mentres os pais remataban, na casa, os últimos flocos da cea de Nadal. Todos eles (todos nós) retornados de diferentes lugares: de Madrid a Londres, de Gran Canaria a Palma de Mallorca, de Santiago Compostela á Coruña. Non era difícil ter unha perigosa revelación: o que debera ser ordinario -a xente nova da vila tomando algo nos bares antes de cear- convertíase en extraordinario. É nesta presenza tumultuosa onde se nota a ausencia: en como estes mozos non están os restantes 364 días do ano.

Quen queira que teña viaxado por capitais europeas como Berlín ou Bruxelas sabe perfectamente a que me estou referindo. As rúas están cheas de xente nova; detrás de todas estas persoas están ideas, ilusións, flexibilidade e proxectos. Cando escoito os presidentes de asociacións de empresarios falar da «perda de competitividade», estráñame que sempre empreguen o argumento para se queixar das subas salariais e non protesten por este dispendio do valioso capital humano do país.

Porque todos estes mozos non van á aventura: van na procura dunha vida digna. Galicia, como calquera outro país, ten nestes intres moitos problemas que afrontar. Pero non se me ocorre ningún máis importante que o de sementar futuro para os novos que veñen detrás.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
10 votos
Comentarios

Ausencias