María José Torres: «O primeiro momento é terrible, un pregúntase canto tempo lle queda»

Fundou, xunto con 14 veciñas máis, o colectivo contra o cancro de Porto do Son


ribeira / la voz

A Asociación Española Contra o Cancro (AECC) é unha das entidades que máis solidariedade arranca entre os barbanceses. Son moitos os que, dun ou doutro xeito, achegan o seu gran de area para tratar de frear unha enfermidade á que poucas persoas, directa ou indirectamente, permanecen alleas. En varias localidades da comarca funcionan as denominadas xuntas locais, colectivos que traballan de forma coordinada coa asociación estatal. A esa rede veñen de sumarse quince veciñas de Porto do Son, que decidiron fundar unha xunta local, á fronte da cal se sitúa María José Torres Calo.

Ela sufriu en carne propia ese pesadelo que desencadea cada diagnose de cancro, polo que sabe do importante que son tanto a investigación para frear o avance da enfermidade como a axuda que os pacientes precisan. María José Torres tiña 40 anos cando recibiu a fatal noticia: «Non o esperaba, supoño que como lle pasa ao resto dos enfermos, porque me atopaba perfectamente de saúde. Fun ao médico pensando que tiña un problema de tipo muscular na zona do peito e unha mamografía resultou definitiva».

Agora, sete anos despois da operación e dos tratamentos de quimioterapia e radioterapia, quere lanzar unha mensaxe de positividade: «O primeiro momento é terrible, un pregúntase canto tempo lle queda de vida, pero eu decateime de que tiña que erixirme como a capitá do barco, porque se me fundía arrastraría comigo a toda a familia, que estaba desfeita. Eu quería vivir e saquei forzas do máis profundo, de onde pensaba que non quedaban».

A idea inicial

Superado o pesadelo, María José Torres non pestanexou cando unha amiga, Magdalena Pérez, lle propuxo aliarse na loita contra o cancro mediante a posta en marcha dunha asociación. Na conversa participou María Teresa Fernández, que tamén se sumou á causa desde o primeiro momento, ata o punto de que ocupa a vicepresidencia da entidade. Aínda que está pendente a presentación oficial, o grupo xa tivo o seu primeiro contacto cos veciños de Porto do Son e resultou bastante positivo: «Vendemos lotería de Nadal e a resposta da xente foi boa, estamos satisfeitas de ter dado este paso adiante», comenta a presidenta da xunta local.

A nova entidade sonense non ten de momento unha folla de ruta a seguir, pero as integrantes da xunta directiva pretenden deseñala xusto despois da presentación programada para este xoves. Queren poñerse mans á obra canto antes: «A nosa idea é organizar diferentes actividades para recadar fondos e contribuír así á investigación da enfermidade. Un dos nosos obxectivos é promover unha cea ou gala, como se fai noutras localidades de Barbanza».

María José Torres e as súas colaboradoras tamén queren abrir unha liña de axuda a persoas afectadas: «O apoio, tanto ao paciente como aos seus familiares, é fundamental, e ás veces os enfermos descoñecen os servizos aos que poden acceder a través da AECC, polo que un dos nosos cometidos será achegárllelos». Na andaina que veñen de emprender, estas aventureiras sonenses contan co apoio do Concello, que puxo á súa disposición un pequeno local fronte ao centro de saúde para que o empreguen como base de operacións, e dos salóns de peiteado, que xa están reunindo melenas para o banco de pelo. Aspiran, iso si, a medrar: «O que queremos agora é que a xente se sume, que apoie esta iniciativa».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
17 votos
Comentarios

María José Torres: «O primeiro momento é terrible, un pregúntase canto tempo lle queda»