Ribeira recuperou enclaves únicos para conectar entorno urbano e natureza

Diversos proxectos lograron humanizar zonas que atraen a veciños e visitantes

la voz
Ribeira / La Voz.

Se algo queda para sempre gardado na retina é o encanto e fastosidade da natureza. Poucos poden esquecer esa imaxe dun amencer ou dun luscofusco mentres a brisa do mar lles acariña a pel. É por iso que fusionar os beneficios da cidade cos do medio natural foi un dos eixos do Concello de Ribeira. Esta inquedanza, que permitiu recuperar do esquecemento enclaves únicos, coloca á localidade entre as máis atractivas para o turismo e para os propios veciños da contorna.

Destacada e premiada por expertos da materia foi a remodelación da Pedra da Ra, unha das propostas de maior éxito e calado levadas a cabo polo executivo. Milleiros de persoas acoden a este lugar cada ano, perfecto para deixarse levar por ese intre no que o sol se esconde tralo mar mentres o ceo se tingue de cores. As instantáneas son inevitables dende un miradoiro que permite contemplar Aguiño, a illa de Sálvora, o parque natural ou Corrubedo.

Conectar San Roque co Monte da Cidade foi outro dos proxectos levados a cabo polo Concello. Cumprir esta vella demanda permitiu aos amantes das camiñadas percorrer o traxecto que conecta o centro da localidade co conxunto arqueolóxico sen necesidade de loitar para evitar o tráfico rodado.

Parque natural

Dende o propio castro ábrese ante o visitante unha das maiores xoias da localidade, o parque natural de Corrubedo, así como as lagoas de Carregal e Vixán, a primeira de auga salgada e a segunda de doce. Con pasarelas que conectan practicamente cada enclave, destaca a gran duna móbil, dun quilómetro de longo, así como a praia do Vilar, da que gozan milleiros de persoas cada verán.

Seguindo o percorrido, o faro de Corrubedo oposita para converterse noutro atractivo a ter moi en conta. Logo de que o Consejo de Ministros dera o visto bo ao proxecto, só queda que este vexa a luz. Esta icona da paisaxe ribeirense contará con un restaurante, un quiosco e un hotel con 11 habitacións. O executivo aproveitou este movemento para adiantarse e mellorar as beirarrúas que conectan a parroquia co lugar, perfecto para contemplar a forza do mar rompendo contra as rochas.

Pero esta iniciativa para conectar cidade e natureza non se detén en Corrubedo. A senda peonil de oito quilómetros que percorre o leito do río Artes converteuse no lugar perfecto para deixarse levar polo son da auga e da fauna, deixando atrás o mundanal ruído da vida urbana. Para completar o proxecto, o executivo restaurou o lavadoiro no que se inicia a ruta. Dunha lonxitude duns 28 metros, trátase dunha peza que garda na súa rocha a memoria dos centos de veciños que acudiron durante décadas ata o lugar. Unha peza dun valor sentimental incalculable.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Ribeira recuperou enclaves únicos para conectar entorno urbano e natureza