Santiago García: «Estou seguro de que a Alberto Romero lle encantaría este certame de curtas»

O concurso naceu como unha homenaxe, pero segue unha traxectoria imparable


ribeira / la voz

Foi, ao longo da súa vida, un activista social que desenvolveu a súa loita, fundamentalmente, no eido educativo. Por iso, trala súa morte no 2015, as ANPA de Ribeira quixeron renderlle a homenaxe que se merecía a Alberto Romero, promovendo no seu nome un certame de curtas. Debido á relevancia que foi cobrando a iniciativa, da que está en marcha a terceira edición, fíxose precisa a constitución dunha asociación encargada da coordinación. Á fronte sitúase Santiago García.

Aparte de amigo de Alberto Romero, este veciño de Palmeira traballou cóbado a cóbado con el en varias ANPA, polo que asumiu o reto de manter viva a súa memoria desde o primeiro momento. «Chamáronme da ANPA do Número Un e apoiei a iniciativa de forma inmediata», lembra, ao tempo que engade que tamén participaron no proxecto as asociacións de pais do IES Leliadoura e do colexio de Palmeira. Foron os docentes os que orientaron a homenaxe cara o audiovisual: «O cine sempre foi unha das paixóns de Alberto e os mestres tamén nos comentaron que podía ser unha boa opción tendo en conta o interese dos mozos polas novas tecnoloxías».

E así foi como naceu o certame de curtas Alberto Romero, concurso que segue unha traxectoria ascendente: «Fixemos unha primeira edición cos centros educativos de Ribeira, pero tivo unha aceptación tan grande que decidimos que medrara a perdurara no tempo», explica Santiago García. E, por aclamación popular, o certame estendeuse a toda a comarca de Arousa norte e incluso máis alá das súas fronteiras: «Nesta terceira edición incluímos unha categoría libre e aberta a toda Galicia. Imos variando as bases tendo en conta as peticións que nos trasladan». De feito, este ano o concurso incorporou un programa formativo, con obradoiros de elaboración de curtas que se desenvolveron en Ribeira, Boiro, A Pobra e Rianxo: «Quedei sorprendido vendo como gozaban os nenos participantes».

Traballo en equipo

Máis alá do fin co que naceu, como homenaxe, a iniciativa persegue a difusión do audiovisual entre as novas xeracións: «Estou seguro de que a Alberto Romero lle encantaría este certame de curtas porque, ao final, o obxectivo é darlle a mellor educación aos nosos fillos e o audiovisual é un eido que se toca moi pouco desde as aulas, está case sempre concibido como unha actividade extraescolar». O traballo en grupo é outro dos piares desta iniciativa: «Nalgunhas das curtas que concorreron o ano pasado participaron aulas completas e esa unión dos rapaces é o que tamén perseguimos».

Diante da traxectoria ascendente que rexistra o concurso, a asociación que preside Santiago García non quere poñerse límites: «Imos medrando a partir das achegas que nos fai a xente e aspiramos a mellorar ano tras ano, sen teito. O certo é que non temos claro a onde queremos chegar, o tempo o dirá».

O certame audiovisual é o eixo, pero a entidade tamén traballa en outra importante iniciativa vinculada con Alberto Romero. Baralla nestes intres a posibilidade de publicar unha obra que compile algúns dos seus textos: «Gustaríanos, polo menos, sacar á luz un libro coas colaboracións que fixo para o libro das festas de Palmeira». Santiago García comenta que a produción que deixou é máis ampla: «Ten poemas e algo de narrativa, tanto en galego como en castelán e en inglés. Incluso deixou un par de noveliñas, pero non sabemos se están ou non rematadas».

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos
Comentarios

Santiago García: «Estou seguro de que a Alberto Romero lle encantaría este certame de curtas»