A apertura do urbanismo á natureza

As grandes actuacións e inversións do executivo forman parte dun plan conxunto de futuro dirixido a potenciar os recursos ambientais, turísticos, culturais e patrimoniais da vila e parroquias


Cando se poñen sobre a mesa todas as apostas realizadas nos últimos tempos polo executivo boirense en materia de dinamización da natureza, turismo e patrimonio é doado decatarse de que forman parte dun mesmo plan dirixido a potenciar os recursos existentes e que se apoia neses tres piares para lograr unha sinerxía total. Mais non só iso, pois actuacións como as dos paseos dos ríos Breiro e Coroño simbolizan unha aposta de futuro que lle abre as portas da natureza a un urbanismo coidado e humanizado.

A creación destas sendas fluviais supón a habilitación de máis de tres quilómetros e medio dunha cómoda ruta na que se pode admirar a riqueza da paisaxe verde boirense, mentres se camiña comodamente sobre pasarelas que respectan a contorna e se funden con esta. Do mesmo xeito, conta cun matiz funcional, pois este cinto natural tamén está ideado para unir aos habitantes das parroquias coa propia vila e arredores.

Por outra banda, os proxectos non se basearon só en explotar o potencial medioambiental boirense, senón que están acompañados de recursos ideados para atraer ás familias da vila, así como as de visitantes e turistas. Por este motivo, a obra do río Coroño contará cun rocódromo e parque infantil, así como distinto mobiliario. E, polo mesmo motivo, apostouse por ampliar o servizo que se presta dende un parque de caravanas destacado por organismos europeos.

Pegadas sobre o pasado

Cómpre salientar que o patrimonio tamén estivo presente nestas grandes actuacións, a través dos antigos muros e da ponte restaurados a ambas marxes do río Coroño. Mais a meta do goberno local é lograr algo máis que un paseo, pois búscase camiñar sobre o pasado e cultura do pobo boirense. Neste senso, no estuario do Coroño está prevista a recuperación etnográfica dunha antiga rampla de varada e de lavado de ouro, un proxecto que conta coa colaboración da Universidade de Santiago de Compostela (USC).

Seguindo a estela de pasear ao carón do patrimonio da vila, no 2019 continuarase avanzando na construción de dous paseos máis, o que bordeará o emblemático pazo de Goiáns dende O Coído -204.000 euros- e o de O Esteiro -144.000 euros-, este último aproveitando un proxecto de Costas que nunca se chegou a executar, pero do que o Concello conta cos terreos e fondos precisos.

Aínda así, o paseo sobre o que se alzará o impoñente edificio histórico e señorial estará complementado pola restauración do vetusto lagar e os galpóns anexos, un investimento de preto de máis de 300.000 euros. O obxectivo é o de converter a finca de Goiáns nun produto turístico uniforme e co seu propio percorrido para os visitantes.

Turismo e arqueoloxía

En materia de turismo, Boiro continúa a ser un referente na bisbarra co incremento de bandeiras azuis ata chegar ás sete -Barraña, Saltiño, Carragueiros, Retorta, Mañóns, Piñeirón e Ladeira de O Chazo-, así como o mantemento das tres Q de calidade, á que se sumou un sendeiro azul e un centro azul, o Centro Social de Boiro.

Os principais focos de acción estiveron pousados sobre a mellora da accesibilidade e dos servizos de areais coa instalación de aseos, cadeiras para persoas con mobilidade reducida ou de pasarelas. Puxéronse en valor miradoiros como o de Coto da Fiolla en A Figueira ou máis preto do centro, como o do alto da Magdalena. O fomento do deporte coa organización de campionatos nacionais de duatlón, voleibol, campus de fútbol ou o apoio á vela a través do CINA (Centro Internacional de Navegación de la Isla de Arousa) configurou outro atractivo turístico.

Nesta materia hai cifras que falan por si soas, xa que a estratexia náutica de visitar feiras internacionais como as de La Rochelle e South Hampton, así como integrar a ruta de cruceiros da Xunta, acabou por duplicar o número deste tipo de visitantes. Ademais, dende a apertura do Museo do Mar en maio ata o pasado mes xa pasaron un millar de persoas por este.

No Centro de Interpretación Arqueolóxica da Barbanza alcanzáronse as 4.000 visitas. Para entender isto hai que lembrar o financiamento de cada ano a investigadores que realizaron novos achádegos no castro de Neixón, descubrindo o seu pasado medieval, ou o apoio á USC nos xacementos de Moimenta -o máis rico en industria lítica de toda Galicia- e os da serra.

A obra do paseo do río Breiro permitiu que os boirenses gocen de paisaxes de vertixe. FOTO

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

A apertura do urbanismo á natureza