Fernando Abraldes, presidente da Asociación de Pacientes do CHUS, asegura que a maioría dos doentes rexeitan a derivación.
-¿É precisa a concertación?
-Mentres a situación de lista de agarda tan elevada se manteña, a sanidade seguirá sendo un negocio para os operadores económicos privados. Para nós esta situación non é admisible porque non é ético facer negocio coa saúde e porque na sanidade privada non prima a calidade asistencial senón a conta de resultados.
-¿Atópase o doente indefenso?
-A indefensión do doente nestes casos é absoluta. Ao paciente comunícaselle telefonicamente, sen que o interlocutor se identifique e sen que se grave conversa, que pode ter cita para ser atendido nun centro privado concertado, pero non se lle informa das consecuencias que se derivan de non aceptar a asistencia. Os pacientes somos gravemente penalizados cando rexeitamos unha atención nun centro privado. Pasamos a engrosar o que se denomina unha lista non estrutural onde se perde a garantía de atención nos tempos máximos.
-¿Hai moitas negativas?
-O Sergas non publica datos. No 2010 o Consello de Contas fixo un informe de fiscalización no que se reflicte que o 81 % dos doentes que están na lista non estrutural rexeitaron ir a un concertado.
Abraldes lamenta que non se publiquen datos da lista non estrutural do Sergas.