Miguel Ángel Iglesias: «O bou, o xeito e o marisqueo temos que defendelos a morte»

O dirixente rianxeiro defende a conveniencia de diversificar para garantir os ingresos do sector todo o ano


Ribeira / La Voz

Miguel Ángel Iglesias acaba de iniciar o seu segundo mandato á fronte da confraría de Rianxo e aproveita os primeiros compases desta nova andaina para facer repaso dos últimos catro anos e para mirar cara un futuro que ten claro que para o pósito rianxeiro pasa por tres piares fundamentais.

-Comecemos facendo balance dos últimos catro anos.

-Eu creo que, sobre todo os dous primeiros anos, foron moi frutíferos tanto con respecto ao marisqueo como á xestión do bou de vara, que comezamos a facer de forma distinta, e polo feito de contar cunha comercial. Fixéronse cousas boas que temos que retomar porque algunhas quedaron un pouco de lado no último ano e nótase, como a comercializadora. Agora non a temos e hai que recuperar esa forma de traballar porque era máis rendible para os mariñeiros, vemos que as ventas baixaron.

-¿Como andan de saúde as súas concesións marisqueiras?

-Bastante ben. É certo que o ano pasado non foi moi bo, pero non estivo mal en canto a facturación. A media foi de 107 euros por persoa e día de traballo e está bastante ben para ser un ano malo. Imos seguir investindo en labores de rexeneración e imos intentar facer máis limpezas, porque cada vez temos máis algas e máis limo e son necesarias.

-Mentres tanto, teñen ás portas unha nova campaña do bou de vara, ¿participará moita xente?

-É difícil sabelo, porque depende dos armadores. Se están indo co raño e lles vai ben non cambian, e se o marisqueo vai mal irán ao bou. É a vantaxe de diversificar a actividade, que tes alternativas. Por exemplo, o mes de outubro no libre marisqueo é un desastre porque ninguén ten a onde ir traballar e acaban todos nos Lombos. Iso provoca que o recurso quede moi limitado e supón un problema para quen non vai a outras artes e só ten a opción do rastro. Por iso é conveniente diversificar.

-Outro ámbito de actividade fundamental para Rianxo é o xeito, que vive tempos convulsos.

-O bou, o xeito e o marisqueo temos que defendelos a morte porque dependemos deles.

-¿Hai futuro para o xeito?

-Penso que hai futuro, pero se non o vemos é por como nos están regulando, xa sexa desde Galicia ou desde Bruxelas. O xeito é unha pesca artesanal sostible, e o que non pode ser é que Europa defenda as vantaxes deste tipo de artes, pero logo non o aplique na práctica. Esas políticas de defensa da pesca tradicional non chegan a onde teñen que chegar. Para empezar, artes coma o xeito teñen que estar fóra de cotas e taxas e é necesario que se regulen as augas interiores e, se é que temos competencias nelas, nos deixen xestionalas.

«O plan dos bancos libres depende da Xunta»

Ao recentemente renovado cargo de patrón maior, Miguel Iglesias sumou novas responsabilidades na entidade Rañeir@s Ría de Arousa, que trata de xestionar os bancos de libre marisqueo. Seis confrarías do norte e o sur da ría van da man neste proxecto.

-Acaban de enviar á Xunta unha proposta para a xestión do libre marisqueo, ¿como pinta a cousa?

-Presentamos a nosa proposta e agora o plan dos bancos libres depende da Xunta. No seu momento nós propuxemos na consellería ou ben elaborar un plan conxunto ou ben o reparto das zonas de traballo, pero para isto último tiña que haber unanimidade e había entidades que non estaban de acordo, así que elaboramos un documento de xestión.

Seguir leyendo

A entidade destinará fondos propios a rexenerar os bancos naturais

O patrón maior de Rianxo ten clara a necesidade de coidar os bancos marisqueiros para que sigan sendo produtivos, polo que neste novo mandato se van reforzar os labores de rexeneración das concesións achegando incluso fondos propios da entidade para sufragar eses traballos.

Xa nos últimos anos se teñen destinado recursos á rexeneración dos bancos naturais que xestiona a confraría, investindo cada ano entre 20.000 e 40.000 euros nestas tarefas. A intención do cabildo é continuar con esta liña de traballo neste mandato.

Seguir leyendo

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Miguel Ángel Iglesias: «O bou, o xeito e o marisqueo temos que defendelos a morte»