Mar Callón: Á procura dunha oportunidade artística

É de Ribeira, pero representa ás Terras de Pontevedra no concurso «Recantos»


ribeira / la voz

Son moitos os cantantes que buscan nos concursos unha plataforma de lanzamento que lles permita facer realidade o seu soño de traballar enriba dun escenario. É un mundo complicado, no que son demasiados os que tratan de brillar, pero poucos os que conseguen converterse en estrelas. Aínda así, o importante é participar. Iso é o que pensa Mar Callón Torres. Ela é unha veciña de Ribeira que apareceu o pasado venres na pequena pantalla, para amosarlle a Galicia o que é capaz de facer coa voz. Participa no certame Recantos, enmarcado no programa Luar.

Aínda que é do municipio ribeirense, Mar Callón representará nesta ocasión ás Terras de Pontevedra, unha zona á que estivo moi vinculada: «Estiven alí vivindo seis anos e gardo moi bos recordos, ademais de ter grandes amigos. A proposta que me fixeron desde o concurso foi esa despois de superar a proba que tiven que facer, e decidín aceptala». Non dubida en recoñecer que lle gustaría moito máis representar a Barbanza, comarca na que naceu e onde reside actualmente, pero unha razón de carácter sentimental influíu para que non optara por esperar á convocatoria do vindeiro ano: «Miña nai sempre me animou a que cantara e como ela estaba moi enferma, quixen participar canto antes para que me vira actuar na televisión». Non poderá ser, xa que a proxenitora faleceu, pero na súa memoria, esta artista decidiu seguir adiante e dalo todo enriba do escenario.

No Picoro noiés

Aínda que a vida a foi levando por outros camiños, Mar Callón lembra que medrou cantando as cancións de Ana Kiro e Rocío Dúrcal, ao tempo que rememora con morriña os festivais dos colexios nos que sempre se apuntaba para coller o micrófono. A súa traxectoria profesional descorreu despois lonxe dos escenarios, pero hai pouco máis dun ano decidiu mergullarse no mundo da música a través do coro Picoro de Noia: «Somos como unha pequena familia, que estamos nestes intres dándolle forma a un repertorio variado, con música negra, temas modernos e algunha canción en galego».

Co director desta formación, Narci Rodríguez, a ribeirense ensaiou e arranxou o tema que interpretou en Recantos, unha canción de Víctor Manuel: «Aínda que non a coñecía anteriormente quedei contenta co tema. Iso si, teño que recoñecer que estaba nerviosa e que puiden facelo mellor»».

Sabe da dificultade que ten gañar un concurso no que concorren uns vinte participantes, pero considera que vivir a experiencia xa paga a pena: «É unha porta que se me abre para explorar e ver se podo seguir por este camiño. Tamén espero que me permita coñecer xente». Gustaríalle, como a calquera que se presenta a un certame, gañar ou obter un posto relevante, pero xa está satisfeita pola oportunidade que ten diante dela: «Participar xa é un paso adiante moi importante e gustaríame que este certame me abrira a posibilidade de mergullarme no sector audiovisual. Se non o consigo, seguirei dedicándome ao meu, que é o mundo da naturopatía. O único que quería era vivir unha experiencia divertida e saír da rutina».

A ribeirense participa no concurso televisivo convertida en Mar K. John, o seu nome artístico: «É unha singular forma coa que o meu irmán escribiu un día o meu nome nun libro. Gustoume e decidín agora empregalo». Calcula, tendo en conta que aínda quedan 18 aspirantes máis por actuar, que o resultado non se coñecerá ata o mes de decembro: «Comentan que os dous que actuamos o venres conseguimos moitos votos, que deixamos o listón bastante alto, pero hai que esperar para ver o que ocorre finalmente».

Traxectoria . Mar Callón é naturópata, pero cantar constitúe a súa gran paixón desde que era nena. Hai pouco máis dun ano incorporouse ao coro Picoro de Noia.

Nome artístico. Participa no programa Recantos como Mar K. John.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos
Comentarios

Mar Callón: Á procura dunha oportunidade artística