Todas as artes do Barbanza mestúranse no Museo do Gravado

Un total de 65 manifestacións creativas integran a sexta edición de Barbantiarte


RIBEIRA / LA VOZ

A cultura no Barbanza hai tempo que deixou de ser circunstancial, grazas, principalmente, a colectivos como a asociación Barbantia e a persoas como Javier Expósito, que zumegan xenerosidade para manter acesa a chama da creatividade dos cidadáns deste territorio, ou que non dubidan en poñer á disposición do público espazos e contidos, a modo dun establecemento sui géneris chamado Museo do Gravado de Artes no que abundan obras de interese mundial. E o cumio de ámbalas dúas iniciativas pode dicirse que é Barbantiarte, unha actividade que onte principiou a súa sexta edición con 65 manifestacións artísticas e que permanecerá nas instalacións durante dous meses.

Un numeroso e selecto grupo de barbanceses deuse cita na apertura deste encontro de creadores e creadoras do Barbanza, que introduciu a intervención musical do grupo Barahunda, antes de que tomase a palabra o director do museo, Xoán Pastor Rodríguez, que cualificou Barbantiarte como «unha festa das artes na nosa comarca nunha mostra da creatividade das nosas artistas e dos nosos creadores, unha confluencia de miradas, de vontades, de reflexións, para o goce de todas as persoas».

Festa anual

De seguido, interveu o presidente de Barbantia, Manuel Cartea, que se referiu á cita como «unha das festas anuais da cultura barbantiá: de Barbantia e do Barbanza». Parafraseando a Baudelaire, engadiu que a mostra é «unha proposta firme, arriscada, vangardista, polimorfa, que apela á ollada e á intelixencia do espectador... cómplice e amigo». Instou aos presentes a gozar do encontro e finalizou sinalando: «Esperámosvos o próximo ano, talvez con novidosas propostas. Que o traballo vos sexa leve... e gratificante! Grazas por estardes hoxe aquí, pero, moi especialmente, grazas por serdes».

Tras unha performance do Colectivo Sak, foi a profesora e escritora Aurora Marco a que levou o peso da presentación do catálogo da mostra, empezando cun desexo: «Deixádeme penetrar e camiñar silandeira por este espazo de cultura en cuxa porta me sitúo, con grande admiración e respecto, para entreabrir paseniño os seus 65 apousentos (as 65 obras) e gozar de tanta beleza».

Fío condutor

Consciente da dificultade de enumerar ou valorar cada unha das expresións artísticas incluídas na mostra, botou man dun fío condutor que a foi levando por una serie de obras coas que fixo unha lectura persoal de todo o que integra Barbantiarte.

A escritora foi citando creacións nas que percibiu conceptos como reflexións sobre os problemas do planeta, a busca para facer a descuberta propia, o proceso creativo, diferentes situacións da vida cotiá, os mitos, a protesta, a reivindicación, os rostros da inocencia, «os espazos soñados, o silencio, o mar que nos dá serenidade, a incerteza, o enigma, a placidez, a soidade, a ledicia, as lembranzas, a liberdade», unha manchea de mensaxes repartidas en materias tan diversos como a pedra, a madeira, a tea, o ferro, o aceiro, o vidro policromado, o granito do país, o papel, o linóleo, o cartón pedra, o arame e até o refugallo.

Aurora Marco avogou porque o profesorado dos centros educativos da comarca organice visitas dos alumnos á exposición e rematou apuntando: «Hai moita arte no Barbanza, moita beleza, moitas mensaxes, moito que aprender das e dos artistas presentes neste marco privilexiado, que forma parte das paisaxes do lugar de Outeiro».

En representación do Concello de Ribeira interveu o concelleiro Emilio Pérez, e pola Deputación, Ánxela Franco.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Todas as artes do Barbanza mestúranse no Museo do Gravado