Adrián Mosquera: «Estou adestrando coa motivación de chegar ás olimpíadas de Tokio»

O rianxeiro explica como foi a preparación de cara ao Europeo que disputará a próxima semana en Serbia


Dez meses despois de comezar a tempada, Adrián Mosquera (Rianxo, 1996) estará no Campionato de Europa de Piragüismo. Viaxará a Serbia, onde, dunha vez por todas, quere entrar na elite continental. É consciente de que non será fácil e que a súa xuventude xoga na súa contra. A pesar do titánico reto que ten diante mantén o sorriso. Despois de centos de adestramentos, ¿por que non seguir soñando?

A falta dunha semana para viaxar a Serbia, ¿como sente que preparou esta proba?

Levamos adestrando dende setembro. Cando comezamos decidimos deixar as distancias longas e centrarnos nas curtas, concretamente na de 200 metros, que é a olímpica e na que competirei en Serbia. O ano pasado compaxinabamos ambas, pero este decidimos aumentar a intensidade e non a carga de quilómetros. Fixémolo todos os do equipo sénior.

¿Veu melloría co cambio?

Si, intentamos paliar algúns puntos débiles que tiña, como é o caso da forza, na que ía un pouco xustiño, e démoslle máis importancia ao ximnasio. En 200 metros precisas explosividade. A maiores tamén reducimos o número de competicións ás que acudimos, polo que chego máis fresco de cara ao Europeo.

Chega lanzado.

Baixei preto de dous segundos con respecto á miña mellor marca. O traballo dá os seus froitos. En Serbia veremos como estou realmente. Aínda me queda para chegar ao nivel máximo.

Terá a Juan Antonio Valle como principal contrincante, xa que é o primeiro padexeiro español.

É un dos cinco mellores de Europa. Cando competimos nalgún torneo nacional sei que se estou preto del terei boas marcas. É un aliciente que haxa este nivel en España, porque me obriga a ser máis competitivo e a esforzarme para alcanzar o seu nivel.

¿Cal é a marca que se pon?

Teño a esperanza de loitar ata o último segundo para entrar na final A. Se non é así, o obxectivo será meterme cos primeiros da B.

Unha vez de volta, terá o Campionato de España, ademais da clasificatoria para o Mundial. ¿Vese tamén nesa cita?

Véxome con forzas, xa me encontro nun nivel no que estou por enriba do da tempada pasada. Se non hai ningún contratempo, e se chego en óptimas condicións, quero intentalo.

A pesar da súa xuventude, xa se atopa dentro da elite nacional.

A mellor época para un padexeiro é entre os 25 e os 30 anos. Hai algún, como Cooper, que con 21 xa está arriba, pero é a excepción. Por exemplo, Valle está nos 40. Vén moi rodado e sempre se lle dou moi ben o piragüismo. Agora quere aproveitar este tempo para poder ir a Tokio.

¿Estará vostede?

Sería un soño. Estou adestrando coa motivación de chegar ás olimpíadas de Tokio. Sería a culminación a todo este traballo, pero hai que ir paso a paso. Se o conseguira sería a confirmación de que fixen un gran papel no Mundial ou no Europeo. Sei que son novo, pero gustaríame conseguilo. É o que teño en mente.

O apoio de Ourille, e dos compañeiros do Rías Baixas, é fundamental.

Para min é o máis importante. Non é o mesmo adestrar só, cun GPS, que con compañeiros que tiran de ti. Ourille e Maikel, que se meteron a competir, son un gran apoio, ademais do resto de compañeiros do equipo sénior.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Adrián Mosquera: «Estou adestrando coa motivación de chegar ás olimpíadas de Tokio»