Pablo Bugallo: «Gustaríame ser bombeiro, sacrificarme e axudar á xente»

Co triplete nacional no currículo, o boirense aposta por facerse un oco na selección española de cara o verán


Hai poucas persoas que exemplifiquen como Pablo Bugallo (Boiro, 1991) os valores inherentes ao deporte. A unión de garra, corazón, traballo en equipo, perseveranza e loita son a súa receita para o éxito, tanto nas pistas de voleibol de toda España como na vida mesma. O barbancés exerce como un dos mellores embaixadores do seu Boiro natal na totalidade do país.

A xesta que acadou esta tempada, na que alzou tódolos títulos nacionais co Teruel, co que renovou onte por unha tempada máis, está ao alcance dun grupo de privilexiados. A campaña non rematou para el, tócalle enfundar a camiseta da selección española para disputar a Golden European League, que se xogará a finais deste mes e do próximo.

-Logo do triplete tócalle defender a camisola nacional, ¿como afronta este novo reto?

-O certo é que nos tocaron rivais moi complicados, como son República Checa, Portugal e Finlandia. Intentaremos facelo o mellor posible e demostrar que podemos con eles. Somos un grupo novo, de moitos xogadores que se incorporan á selección. Temos ganas de practicar entre nós antes de comezar a xogar.

-¿Como definiría o nivel do voleibol en España?

-Creo que a crise fixo que os clubs tiveran máis complicado fichar xogadores de fóra, iso vese nas pistas. Houbo moitos recortes, perdéronse subvencións... Non obstante, creo que a Superliga goza dun gran nivel, contamos con xogadores dunha calidade excelente. Non por marchar vas ser mellor ou peor. Aquí tamén podes competir.

-Tivo a oportunidade de competir fóra, pero ao final decidiu manterse un ano máis en Teruel. Á vista está que se tratou dunha boa decisión.

-A verdade é que si. Tiven ofertas de Italia, Francia e Romanía. Non obstante, economicamente non compensa. A principios da tempada pasada renovei en Teruel porque me sentía como se estivera na casa. O corpo técnico e a directiva son excelentes, sempre me trataron moi ben.

-¿Fátalle visibilidade ao voleibol na televisión?

-Ogallá houbese máis partidos televisados, aínda que fora un á semana. Porén, aí non me podo meter. Trátase dun tema complicado no aspecto económico, porque pode que á federación, ou aos diversos canais de televisión, non lles saia rendible e que por iso o boten atrás.

-¿Ata cando pensa que estará nas pistas de voleibol?

-Iso depende das lesións, teño un compañeiro que con 39 anos é un auténtico animal, aínda que unha boa idade para deixalo pode ser entre os 32 e os 35. Creo que hai vida máis aló do voleibol. Creo que hai que aproveitar a oportunidade, sacarlle partido ao deporte e intentar dar o mellor dun mesmo, pero a vida segue cando isto remata.

-¿Onde se ve cando remate?

-Gustaríame ser bombeiro, sacrificarme e axudar á xente. Creo que é un traballo realmente gratificante porque che permite estar coa xente cando ten un problema. Estou pelexando para sacar a oposición, hai que prepararse moito fisicamente para conseguilo. Foi un oficio que sempre me gustou, dende neno, e nun futuro gustaríame estar traballando diso.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

Pablo Bugallo: «Gustaríame ser bombeiro, sacrificarme e axudar á xente»