Juan Manuel Lameiro: «Suplimos tratamentos que non está cubrindo aínda a Seguridade Social»

Asociación Galega de Linfedema, Lipedema, Insuficiencia Venosa Crónica e Outras Patoloxías Periféricas. Este é o novo nome co que a entidade -creada no 2004- decidiu rebautizarse segundo se aprobou nunha asemblea celebrada o sábado en Teo. O motivo foi ampliar a atención a máis doenzas, «porque os afectados chegaban a nós en procura dalgunha axuda e, como son patoloxías relacionadas, por iso nos pareceu oportuno traballar conxuntamente», afirma Juan Manuel Lameiro, que lidera esta organización desde os inicios.

O linfedema é unha inflamación que se produce por problemas do sistema linfático, e que se dá en persoas operadas dun cancro de mama ou próstata, unha intervención xinecolóxica, unha parálise ou un accidente, como causas máis frecuentes. A enfermidade consiste nunha alteración da graxa corporal, que se acumula na parte inferior do corpo. Son dous problemas de saúde que afectan maioritariamente ás mulleres. As insuficiencias venosas son moito máis frecuentes na poboación, aínda que Lameiro indica que só acollen os casos crónicos. «Son patoloxías que están relacionadas, pois persoas afectadas dunha delas pode chegar a padecer outra; e que teñen necesidades de prestacións, como as ortoprotésicas, ou tratamentos, tamén semellantes».

Para esta asociación foi unha prioridade nestes case tres lustros potenciar a atención ao seu colectivo. Tiveron entrevistas coa Consellería de Sanidade, contactaron con entidades de fóra de Galicia e conseguiron avances como unha unidades especial no servizo de rehabilitación do hospital Clínico no ano 2009.

Lameiro destaca tamén a integración, pouco despois, na Confederación Galega de Persoas con Discapacidade (Cogami), «que nos presta unha gran axuda, e o seu asesoramento e apoio supuxo para nós case como un antes e un despois. Apreciamos moito a atención na sanidade pública, aínda que non ten suficientes profesionais para dar resposta a todas as nosas necesidades e existen longas listas de espera. É por iso que, co noso traballo e xestións, suplimos tratamentos que non está cubrindo aínda a Seguridade Social».

Atención de fisioterapeutas

Resalta en especial a asistencia de fisioterapeutas especializados: «Grazas a un subsidio que se nos concede pola parte social do IRPF e pola Fundación ONCE podemos favorecer que se traten por profesionais e centros especiais unhas cen persoas con linfedema en diversas localidades galegas. Como as persoas que padecen lipedema e insuficiencia venosa crónica agora non teñen unha oferta así, a nosa intención é traballar para que dispoñan de asesoramento sobre os tratamentos que precisen, indicar onde poden dar con solucións e, en definitiva, contribuír para resolver as súas necesidades», acrecenta o presidente da asociación.

Estes apoios son moi valiosos e interesantes. Porén, non resultan suficientes, e teñen outras aspiracións, «en especial, que se diagnostiquen ben todas as persoas que padecen estas doenzas, pois moitas están sen diagnosticar e sen recibir tratamento, cando o linfedema pode chegar a ser moi discapacitante e desfigurante, o estado máis grave é a elefantíase», refire Lameiro.

E tamén se preocupan doutros temas de interese, como nutrición e linfedema. Precisamen te este foi o asunto abordado polo nutricionista Santiago Carro nesta última asemblea, que foi seguida da comida que levan a cabo todos os anos, e para a que viñeron parte das 200 persoas que teñen asociadas en diversas comarcas de Galicia.

---

---

---