Roberto Oliveira: «Boiro actualmente está a vivir unha explosión cultural»

O artista ofrece un concerto de música contemporánea nun escaparate da vila barbancesa


Hoxe • Escaparate da tenda Telarium (Estatuto de Galicia, Boiro) • 21.00 horas • Os boirenses están afeitos a ter á súa disposición un amplo e variado abano de concertos, pero o que se levará a cabo esta noite é especial. Roberto Oliveira actuará tralo escaparate da tenda Telarium e o público terá que conformarse con escoitalo desde a rúa. Por algo está considerado un dos artistas máis creativos, atrevidos e innovadores do panorama musical contemporáneo de Galicia.

-¿Que vai ver o público que hoxe se achegue á rúa Estatuto de Galicia boirense?

-Pois vou representar un concerto de 30 minutos de duración para multipercusión, electrónica e arte visual sincronizada. Trátase dunha intervención artística na cal só eu vou estar situado dentro da tenda. Os altofalantes e mais o público estarán fóra, na rúa. Mikrokosmos con mucha prisa é un proxecto feito cun tipo de música agresivo.

-¿Como se lle ocorreu a idea de situarse detrás dun escaparate?

-A idea xa ben de moi atrás, dos meus tempos fóra, en Holanda e en Irlanda. Xa tiven a experiencia de traballar nun formato parecido, pero con outro tipo de formación. Conceptualmente, Mikrokosmos está baseado nos tempos consumistas e de alta velocidade da vida (compras, tendas, rúas con xente con présa) que estamos a vivir. Isto quere dicir que estamos presos, que estamos encerrados no noso particular escaparate. Neste caso, a que vai encher a cristaleira durante a intervención vai ser a vermello, o Red Line Distritc de Amsterdam, porque nós somos de algunha maneira os que nos prostituímos nese escaparate consumista.

-¿A que se debe a elección de Boiro para levar a cabo esta iniciativa?

-Por unha banda, a que Boiro é un pobo no que as súas rúas teñen un certo movemento; e logo, a que esta vila actualmente está a vivir unha explosión cultural en moitas disciplinas bastante importante. Ten músicos, artistas plásticos, deseñadores de moda e incluso salas de concertos con gran relevancia dentro e fóra de Galicia.

-¿Que lle diría aos veciños da comarca para que se animaran a acudir a este singular concerto?

-Pois que traian paraugas (risas) e que veñan coa mente aberta para oír, ver e sentir unha actuación musical e artística que de seguro non os deixará indiferentes.

-¿Ten prevista algunha outra actuación nesta comarca nun futuro próximo?

-Pois de momento non. O que si estiven recentemente foi aquí en Boiro, na Pousada das Ánimas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Roberto Oliveira: «Boiro actualmente está a vivir unha explosión cultural»