Nacida en Río da Prata, esta muller emblemática na diáspora tiña raíces en Barbanza, de onde eran os seus pais
15 nov 2017 . Actualizado a las 05:00 h.Maruxa Boga. Recordando a Galicia é o título do libro, con disco incluído, que a Central Folque ven de editar coa colaboración da Secretaria Xeral de Cultura co fin de recuperar a memoria dunha muller emblemática na diáspora, por ser a principal locutora dos espazos radiofónicos galegos en Arxentina. A través deles, divulgou a música xerada na colectividade da emigración desde 1945 cando, seguindo a proposta que lle fixera Castelao, que apadriñou a primeira emisión, creou o programa Recordando a Galicia, que se mantivo ata 1984.
Nacida en Río da Prata en 1915, Maruxa Boga sempre asumiu como propia a orixe galega dos seus pais, que eran de Barbanza. Polo seu estudo pasaron intelectuais como Castelao, Luís Seoane ou Manuel Colmeiro; aínda que o espazo que dirixiu serviu fundamentalmente para poñer en valor a música galega creada en Arxentina.
O libro foi presentado nun acto que tivo lugar no Consello da Cultura Galega, e que contou coa presenza dos seus autores: Jesús Blanco e Norberto Pedro Cirio.