Xoán Pastor Rodríguez: «Pasar dos cen exemplares é o gran mérito»

Destaca a implicación dos colaboradores e cualifica o suplemento cultural de referente a nivel galego


La Voz de Galicia e a asociación Barbantia presentarán este xoves o cuarto recompilatorio de A Voz de Barbantia, un volume que aglutina os suplementos comprendidos entre o número 101 e o 125. Entrevistas a intelectuais, reportaxes que levan a botar a vista atrás, críticas de arte e artigos sobre destacados escritores son algúns dos contidos que os lectores atoparán nesta publicación. Detrás da súa coordinación hai un equipo de persoas do que forma parte Xoán Pastor Rodríguez.

-¿Que supón para Barbantia a saída á luz deste quinto recompilatorio?

-Supón que, despois dunha andaina tan longa, seguimos aquí. O normal é que unha publicación deste tipo non consiga manterse tanto tempo. Neste caso, o agradecemento ten que ser para os colaboradores que sempre están aí. Pasar dos cen exemplares é o gran mérito e, no noso caso, imos xa camiño do sexto recompilatorio, xa que o venres publicarase o suplemento número 127.

-¿Que foi o máis difícil ao longo desta andaina?

-Penso que os problemas estiveron concentrados nos comezos. O que máis nos custou a todos foi adaptarnos aos espazos. Estamos afeitos a escribir case sen límites e resulta complicado cinguirte a un espazo e ter que concentrar nel o máis relevante.

-¿Hai algunha sección estrela neste suplemento?

-Penso que o suplemento en si é unha publicación estrela. Que eu saiba, en Galicia só hai dous suplementos culturais que se publican integramente en galego e o noso é o único que ten esta periodicidade mensual. Iso é para min o primordial, porque constitúe un mérito non só para a cultura de Barbanza, senón para a cultura de Galicia.

-¿Gustaríalle realizar algún cambio no suplemento?

-Hai un engadido do que xa vimos falando desde hai tempo, pois gustaríanos incorporar unha sección dedicada á poesía. Se non se fixo ata agora é polo complicado que resulta publicar un poema tendo en conta o formato do suplemento, pero é unha teima que temos.

-¿Custa atopar colaboradores para esas seccións abertas ao público?

-O problema principal é o da sección En obras, no que saen relato inéditos. Sempre pedimos a colaboración dos institutos da zona.

-¿Trátase tamén de abrir o suplemento, de que non sexa un coto cerrado?

-Si, hai seccións que están dedicadas aos lectores, para que tamén eles poidan achegar o seu grao de area.

-¿Cal é para vostede a recompensa a tanto esforzo?

-A recompensa sempre é o que tes nas mans, que tódolos suplementos se recompilen nun volume destinado á xente que segue as publicacións mes a mes é o mellor agasallo. Tamén é moi satisfactorio ver que a xente segue a colaborar coma o primeiro día, coa mesma ilusión, que nunca falla.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos
Comentarios

Xoán Pastor Rodríguez: «Pasar dos cen exemplares é o gran mérito»