Estoupa en Barbanza a festa da cultura

Barbantia leva a cabo unha nova edición da Romaría das Letras, mentres Noia lembra a Antón Avilés e María Mariño


Aínda que hai xa uns días que a influenza da conmemoración do Día das Letras Galegas se deixa notar en Barbanza coa proliferación de actividades, será hoxe cando un gran terremoto cultural sacuda a comarca. Hai propostas en case tódalas localidades.

Romaría en Goiáns

Hoxe • Finca de Goiáns (Boiro) • 11.00 horas • Barbantia volverá a converter un ano máis os arredores do pazo de Goiáns nun fervedoiro cultural. A Romaría das Letras, que chega á súa sétima edición, inclúe actividades ao longo de toda a xornada, entre as que destacan unha sesións de xogos tradicionais (11.30 e 15.30 horas); a presentación dos libros Protexer o invisible, de Xaime Toxo (16.00 horas), e Da Moura á Shelle-Na-Gig, de Milagros Torrado (16.45); o espectáculo sobre Carlos Casares a cargo do noiés Serafín Marcos (17.30); a representación de A galiña azul a cargo da compañía Airiños; e o concerto que Davide Salvado ofrecerá ás 20.30 horas, como peche.

 

 

Ofrenda en Noia

Hoxe • Casa de cultura de Noia • 12.00 horas • Os actos comezarán en Noia coa inauguración da xa tradicional mostra filatélica, unha exposición que cumpre medio século. Para conmemorar esta efeméride, a asociación numismática local amosará o material que se foi editando ao longo destes anos, ao tempo que estreará un selo e un mataselos dedicados a Carlos Casares. Trala apertura desta mostra haberá unha ofrenda floral diante dos bustos de Antón Avilés e María Mariño, onde realizará una intervención Serafín Marcos. O colofón será un concerto (igrexa de Santa María A Nova, 20.00 horas) coas corais Eixel de Cedeira, Cantares do Miño e a Polifónica de Noia. A maiores, da man dos Chiquiteiros, media ducia de agrupacións folclóricas estarán percorrendo o casco histórico ao longo de todo o día.

 

 

Entre Ribeira e Aguiño

Hoxe • Praza do Concello de Ribeira • De 12.00 a 14.00 horas • • Aguiño • A partir das 16.30 horas • Con xogos populares e cun obradoiro literario arrancarán en Ribeira os actos organizados pola Concellería de Cultura co gallo do Día das Letras. Polas rúas da cidade espallarán os sons tradicionais Xoldra Rachada, Xiada e Arume. Xa pola tarde, o centro de operacións será Aguiño, onde a asociación Lorenzo Mariño ten preparadas varias propostas, entre as que figuran un parque de inchables, unha xornada de debuxo e un espectáculo de maxia, que correrá a cargo de Dani García.

 

 

Homenaxe en Fruíme

Hoxe • Adro da igrexa de Fruíme (Lousame) • 12.00 horas • Xosé Manuel Rivas, profesor de Xornalismo na Universidade Complutense de Madrid e autor dun libro sobre Diego Antonio Zernadas de Castro, o Cura de Fruíme, participa na homenaxe que se lle renderá ao escritor.

 

 

Feira na Pobra

Hoxe • Xardíns Valle-Inclán (A Pobra) • De 12.00 a 14.00 e de 18.00 a 21.00 horas • Libros, cadros, esculturas e pezas de artesanía invadirán os xardíns Valle-Inclán. Será con motivo do arranque dunha feira que se prolongará ata o domingo. As casetas estarán ocupadas, nesta primeira xornada, polas editoriais Axóuxere e Toxosoutos, as asociación Amigos de Valle-Inclán de Vilanova e Ambar, os artistas Cayetano Sánchez e Pitura Rivas, e os artesáns Elena Tubío, Ola Boneca, Mariví, Makradelik e Diane Onlooker. Ás 11.00 haberá unha sesión de contos con Pedro Brandariz.

 

Viaxe ao 1906

Hoxe • Taragoña (Rianxo) • 10.30 horas • Un mercado tradicional e artesanal será o eixo da Feira de 1906 que se desenvolverá en Taragoña. As 18.00 horas haberá un serán con Fogo Fatuo, Tixedal, A Dorniña de Abanqueiro, Estóupele, Nunca é Tarde e Charamuscas; mentres que o grupo Leo de Matamá poñerá o broche ás 21.00.

 

 

Risas no Son

Hoxe • Casa de cultura de Porto do Son • 18.30 horas • O cómico Pedro Brandariz subirase ás táboas da casa de cultura sonense para presentar o monólogo Profundizando na Galicia profunda. Previamente, ás 17.30, os máis pequenos poderán gozar da música e dos contos de Pablo Díaz.

 

 

Sen ruta en Mazaricos

O Concello de Mazaricos tiña programada para hoxe unha ruta polos lugares de interese cultural e histórico do municipio, pero debido ás previsións de mal tempo, decidiu suspender a actividade. Foi fixada para o vindeiro día 28, ás 16.00 horas.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

Estoupa en Barbanza a festa da cultura