Máximas de Chamfort para reivindicar humanidades

Barbantia abandeirou a presentación da tradución da obra do francés, feita polo mestre Raúl Gómez


RIBEIRA / LA VOZ

Que corren malos tempos para as humanidades é unha evidencia que se constata coa teima de ir retirando dos plans de estudos todas as materias que teñan que ver coa creatividade, a cultura e o pensamento, ultimamente coa filosofía no punto de mira. Por iso parece contraditorio que haxa quen pase o arduo traballo de facer a tradución dunha obra filosófica francesa ao galego, e máis aínda que exista unha editorial disposta a publicar o libro, e, por encima, quen non dubide en abandeirar a presentación, e asistir a ela.

Pois todos eses piares xuntáronse no centro social de Boiro con motivo do acto mensual da Asociación Cultural Barbantia, ao amparo da que o mestre Raúl Gómez Pato, que exerceu hai anos no instituto Leliadoura de Ribeira, presentou a súa tradución do libro de máximas Produtos da civilización perfeccionada. I. Máximas e pensamentos. Pequenos diálogos filosóficos.

Máximas vixentes

A directiva de Barbantia Isabel Santos presentou a Raúl Gómez, que foi compañeiro de carreira en Filoloxía Clásica. Cualificou o ensaio de fresco e contundente, destacou que pode lerse desde calquera páxina e que moitas delas están plenamente vixentes. Da tradución, subliñou que está «ben feita, non está acartonada e está ben captada».

Por parte da editorial, interveu Moisés Barcia. Explicou que Raúl Gómez dirixe a colección Vétera, da que forma parte a obra. Manifestou que Rinoceronte distínguese por editar «cousas a desmán», e que no caso desta colección, dáselle prioridade aos clásicos: «Raúl colleu o encargo e estanos a sorprender coa súa selección. Consta dun catálogo interesante e orixinal. Espero que o resultado vos pareza interesante», concluíu.

Pola súa banda, Xesús Laíño, especialista en literatura, explicou as particularidades de Nicolas Chamfort, como participou no asalto á Bastilla, apoiou a Revolución Francesa, entrou na corte, para rematar afastado de todo aquel movemento histórico, o que estivo a punto de custarlle unha vida que el mesmo quixo rematar suicidándose, o que de feito conseguiu polas feridas infectadas dun segundo intento. Falou de Raúl Gómez, do que foi compañeiro no Leliadoura, e da súa obra.

Agradecemento

Gómez tamén centrou boa parte da súa intervención en Chamfort, despois de agradecer tanto as intervencións previas como á editorial Rinoceronte. Acto seguido, regalou á audiencia un feixe de máximas aplicables a diversos eidos da vida, a maioría delas totalmente vixentes.

Pechou o alcalde de Boiro, Juan José Dieste, quen defendeu as humanidades, o pensamento, a filosofía e a sabedoría clásica, para forxar ao individuo.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Máximas de Chamfort para reivindicar humanidades