«Kiwikoalas»


outro día a famosa serie de televisión Cuéntame alcanzou os kiwis, para o meu espanto. Cuéntame é como un monstro que vai devorando a túa memoria.

Estou convencido que en poucas tempadas máis comezarán a adiantarnos e a anticiparnos como será, por exemplo, o xuízo por impeachment de Barron, o fillo pequeno de Trump, presidente dos USA pola graza de Facebook, ou a vendima na Ribeira Sacra con drones.

Os kiwis deberon chegar á Pobra do Caramiñal no ano 82 ou 83, e eu lembro ao tendeiro Marcelo -ao que miña nai chamaba Marchelo imitando a voz de Anita Ekberg na Fontana de Trevi- pregoando marabillas dos kiwis como «todo en un» nutricional.

Pouco tempo despois os kiwis xa pasaron a ser «quibes» e vendíanse no Nazareno canda as tradicionais rosquillas ou cachuchas. Kiwis, caquis, mirabeis, eucaliptos, velutinas: a ver quen di que o país noso non é hospitalario. Os climas temperados integran todo.

Agora a Xunta quere erradicar os mapaches (mapaches!) que chegan ata o río Tambre e eu lembrei esa lenda urbana duns activistas que nos 80 pensaron en traer koalas e guindalos nos eucaliptais, na confianza de que a Xunta declarase oficialmente o eucalipto como especie protexida e ter así unha excelente garantía da súa desaparición.

Non sei que foi deles. Do que non me cabe dúbida é de que, se chegaran a facelo, hoxe moitas casas coidarían dun tranquilo koala na horta, canda o can, o gato e mailas galiñas. Malo para a natureza, pero fantástico para os nosos perfís de Instagram, que son os que contan.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos
Comentarios

«Kiwikoalas»