«Énchenos de orgullo ver que os alumnos queren loitar»

Formou o Sindicato de Estudantes para plantar cara a unha nova lei da educación que considera inxusta


Ribeira / La voz

José Andrés Lojo asegura que o de ir contra o que el considera inxustizas lle vén desde pequeno. É animalista, ecoloxista e preside o Sindicato de Estudantes (SE) en Barbanza, unha delegación que el mesmo impulsou haberá uns cinco meses e que encabeza a protesta estudantil que haberá na comarca en contra das reválidas e da Lomce. Nacido en Palmeira e veciño agora de A Pobra, recoñece que nunca foi bo estudante, cursa primeiro de bacharelato con 18 anos no IES Número Un de Ribeira e o seu carácter batallador o levou este ano ao consello escolar como representante do alumnado. Foi cando empezaron a enviarlle información os sindicatos en Compostela sobre a lei do exministro Wert cando decidiu que alguén tiña que mobilizar aos estudantes da comarca.

-Mañá haberá dúas mobilizacións en Ribeira, unha organizada polo SE e outra por Confapa, ¿que levou ao sindicato a montar a súa propia protesta?

-Convocamos esta manifestación porque sabemos que vai haber moita xente. A maioría dos alumnos, practicamente todos, estamos en contra das reválidas, esta tolería do PP. Pensamos que, cantas máis protestas, mellor. Así ten unha maior visibilidade a nosa oposición a este sistema.

-¿E non sería máis produtivo que pais e alumnos uniran forzas na mesma mobilización para que se vexa un grupo maior?

-Nós tamén convocamos aos pais, amigos e todo veciño interesado a vir á manifestación que organizamos pola mañá. Porque, ao final, o que se está xogando é o noso futuro, o de todos, porque as pensións dos maiores sairán do noso traballo. E, do mesmo modo, pola tarde pensamos unirnos á concentración de Confapa.

-Nas últimas semanas instouse dende o SE a que os institutos da comarca se concentrasen contra da Lomce, ¿como valoran a resposta?

-Moi boa, a verdade. Como xa se esperaba, a maioría da xente acabou concentrándose porque estamos fartos de toda esta metralla que nos están metendo. É máis, a partir de que comezamos a organizar a folga, pasamos de ser tres no sindicato a unha ducia e de ter presenza non só en Ribeira, tamén en Boiro e A Pobra, e esperamos facelo en Rianxo e Porto do Son.

-Habitualmente, e proba diso está nas últimas reválidas celebradas en Barbanza, nos centros públicos un 90% do alumnado participa na folga e nos concertados é unha minoría, ¿que se pode facer ante esta tendencia?

-Está claro que nos privados mandan os pais e os rapaces fan o que eles lles din e creo que responde a unha tendencia política. Se votas ao partido que defende esa lei e esas reválidas non vas permitir aos teus fillos que se manifesten en contra delas.

-¿Como se están a vivir dentro das aulas as xornadas previas á manifestación?

-Con moito entusiasmo. A min alégrame moito que me cheguen polo WhatsApp e outras redes sociais cadeas que non foron creadas polo Sindicato de Estudantes animando a facer folga o mércores (por mañá). Nós, evidentemente, fixemos a convocatoria por estes medios para mobilizar á xente, pero xurdiron outras alleas á organización, promovidas polos propios alumnos. Dende o sindicato énchenos de orgullo ver que os estudantes queren loitar. A xente está farta de todo isto.

-¿Que outros obxectivos se marca o sindicato en Barbanza?

-Crecer e conseguir que todos os estudantes de Barbanza cheguen a ter unha ideoloxía propia, non condicionada polos seus pais, sexa ou non a nosa, pero que estean informados e respondan con argumentos formados por eles mesmos ás circunstancias que os afectan.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos
Comentarios

«Énchenos de orgullo ver que os alumnos queren loitar»