Da comunicación ao ensaio

A traxectoria de Manuel Gago está trufada de actividade nos eidos da cultura, do xornalismo, da arqueoloxía, da gastronomía e tamén como conferenciante, ensaísta e articulista


Manuel Gago Mariño (Palmeira, Ribeira, 1976) é doutor en Ciencias da Información pola Universidade de Santiago de Compostela (USC). Na actualidade, é director de culturagalega.org, o portal de divulgación cultural do Consello da Cultura Galega, e profesor asociado na Facultade de Ciencias da Comunicación da Universidade de Santiago de Compostela, formando novos xornalistas na especialidade de ciberxornalismo. Gago é autor de varios libros sobre xornalismo electrónico e arquitectura da información en Internet. É editor de Capítulo cero, un dos blogs referentes da Rede galega, no ámbito da divulgación histórica, científica, estilos de vida, gastronomía e cultura, e por el ten recibido premios de diferentes colectivos profesionais galegos.

No ámbito gastronómico, Gago é o creador e promotor do Código Cociña, un código de boas prácticas para o blogging gastronómico. Colaborou semanalmente no programa gastronómico da Radio Galega, Come e fala, co que gañou o Premio Nacional de Xornalismo Gastronómico 2010. Tamén mantén The wine codex, unha guía persoal sobre os viños da península Ibérica en inglés. É coautor do libro Rías Baixas, gourmet territory, unha publicación destinada a presentar internacionalmente a gastronomía contemporánea do litoral sur de Galicia. 

No ámbito arqueolóxico, Gago ten participado en proxectos como a escavación do poboado da Lanzada, e ten promovido e coordinado iniciativas de arqueoloxía nos sitios de Pena Furada (Coirós), Torre dos Mouros e Castro de Mallou (Carnota), Croas de Niñóns (Ponteceso) ou Croas de Cerqueda (Malpica). É fundador de patrimoniogalego.net, a rede social do patrimonio cultural de Galicia.

Sendo conferenciante, relator ou articulista, Gago publica a súa produción en distintos medios. Ten publicado canda o arqueólogo Xurxo Ayán, o ensaio Herdeiros pola forza. Patrimonio cultural, poder e sociedade na Galicia do século XXI (2.0 Editora), o libro Vento e chuvia. Mitoloxía antiga de Gallaecia (Edicións Xerais), e, en 2015,  Platos rotos. Textos gastronómicos, unha antoloxía da súa produción xornalística no campo gastronómico.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos
Comentarios

Da comunicación ao ensaio