Hoxe?- Liceo de Noia?-?20.30 horas?? Esta tarde preséntase no Liceo de Noia un novo número, o 50, da revista Alameda. Esta publicación viu a luz por vez primeira no 2000, dan man dun equipo coordinado por Cándido Prego, que segue asumindo dita responsabilidade a día de hoxe.
-¿Por que decidiu o Liceo sacar á luz esta publicación?
-Esta revista foi unha teima do entón presidente José Moas. El tiña moito interese en publicar e levaba tempo dándolle voltas ao tema ata que un día, en marzo do 2000, apareceu cun grupo de persoas que podían poñer en marcha a revista. Alí estaban Pepe Agrelo, Aurora Marco e Pedro García Vidal. En maio dese mesmo ano presentouse o número cero, coincidindo co Día das Letras Galegas.
-¿Que pasou en «Alameda» ao longo destes 15 anos?
-Pois houbo revistas monográficas, como as dedicadas a Antón Avilés de Taramancos e a María Mariño. Houbo un número en homenaxe a Prudencio Romo, que tamén fora colaborador, e outro en lembranza de Pepe Agrelo. O ano pasado publicouse unha reivindicando o Día das Letras Galegas para Manuel Fabeiro, pero non se conseguiu.
-¿Que ofrece o número 50?
-Pois, para empezar, leva a portada e a contraportada deseñadas por Soledad Penalta e Alfonso Costa, que é outro dos puntais da revista. No seu interior facemos un percorrido pola historia da publicación. Celebramos con orgullo que chegamos ao número 50 e que levamos 15 anos publicando a revista do Liceo.
-¿Quen participou na elaboración deste número?
-Os habituais, que son os valedores da revistas: García Vidal, Xerardo Agrafoxo e Pastor Rodríguez. Logo hai colaboracións do máis diverso. É unha revista plural. Este número ten de particular que sae en cor, algo que non é habitual.
-O obxectivo é seguir eternamente, claro...
-Si, longa vida á revista do Liceo. Desexamos que a súa luz nos ilumine nos seguintes anos, pero non é doado atopar colaboradores. Si teño que dicir que, coa que hai, estou plenamente satisfeito, porque todos se toman a revista con moito interese.
-¿Pero hai algunha dificultade para sacar á luz a revista?
-Agora mesmo, non, pero hai que manter esas gañas e ese espírito de colaboración de cara ao futuro. Neste eido, si que teño que mencionar de novo a García Vidal e a Agrafoxo, que viven esta revista como se fose propia.