Cabo conta con recibir unhas 20.000 visitas no Encontro de Embarcacións Tradicionais

Javier Romero Doniz
JAVIER ROMERO RIBEIRA / LA VOZ

BARBANZA

MARCOS CREO

Entre o 9 e o 12 de xullo calcúlase que se darán cita no porto da parroquia boirense de O Castro máis de 150 barcos

23 nov 2014 . Actualizado a las 05:00 h.

Prestando atención únicamente ao traballo xa feito, e imaxinando o que aínda está por vir, un entende rápido que a duodécima edición do Encontro de Embarcacións Tradicionais de Galicia do ano 2015, que terá lugar en Cabo de Cruz, ten todas para ser un éxito seguro. O venres pola noite presentouse o evento, e alí estaban os representantes das entidades que forman a fronte común necesaria para deseñar unha cita pensada para recibir a unhas 20.000 persoas.

A programación está deseñada para realizar actividades en terra e mar. Serán máis de 150 embarcacións as que recalen no porto da parroquia de O Castro, que será habilitado para dar cabida a esta flota con sabor a historia e con características diferentes. Tamén será a edición máis internacional, xa que entre os mariñeiros que van participar, ademais de galegos e españois, chegarán doutros países do Mediterráneo e do Atlántico.

Diñeiro, esforzo e agarimo

Oír falar ao presidente da Federación Galega pola Cultura Mariñeira, Manuel Sendón, ou ao seu compañeiro dentro da entidade Xerardo Triñanes serve para entender que, ademais de esforzo e diñeiro, estase poñendo moito agarimo nos preparativos. A dedicación que está mostrando o colectivo crucense A Gamela tampouco se queda atrás. O Concello de Boiro, pola súa banda, aporta 25.000 euros e estase envorcando con outras necesidades como, por exemplo, a infraestrutura necesaria para albergar aos participantes.