Arousa Norte e Barbantia reúnen aos referentes culturais

m. x. blanco RIBEIRA / LA VOZ

BARBANZA

CARMELA QUEIJEIRO

Editaron unha guía elaborada por Xoán Pastor Rodríguez, na que aparecen máis de catrocentos persoeiros de Barbanza

25 oct 2014 . Actualizado a las 05:00 h.

Máis de catrocentas persoas que deixaron pegada ou a están deixando actualmente no eido cultural de Barbanza forman parte dun libro que, da man de Barbantia e de Arousa Norte, verá a luz en cuestión de días. Xoán Pastor Rodríguez Santamaría é o autor desta Guía de persoeiros da cultura, que será presentada no auditorio de Rianxo o vindeiro venres, coincidindo coa saída á rúa dun novo número de La Voz de Barbantia.

O volume, tal e como explicou onte o seu autor, recompila a persoas destacadas de todos os eidos da cultura, desde a literatura ata a música, pasando polas diferentes ramas artísticas. Abarca, ademais, un amplo período de tempo, que vai desde a Idade Media ata a actualidade. O obxectivo non é outro que darlle difusión a estes nomes propios: «En Barbanza hai unha serie de persoas relevantes que son de sobra coñecidas, como poden ser Castelao ou Manuel Antonio, pero hai moitas outras que non o son tanto e queremos sacalas á luz», manifestou Pastor Rodríguez.

Principais destinatarios

Aínda que todos aqueles que o vindeiro venres, ás 20.30 horas, se acheguen ao auditorio rianxeiro poderán facerse cun exemplar desta guía, os principais destinatarios son os mozos. Por iso, o volume distribuirase polos institutos dos catro municipios que integran Arousa Norte.