«Ver que podía axudar á xente foi o que me motivou»

A moza, que participou no grupo de apoio en Angrois, leva un par de anos á fronte do colectivo de voluntarios

m.?x.?b.
ribeira / la voz

O equipo de voluntarios de Protección Civil de Porto do Son conta desde o 2012 con Laura Sampedro Ponte como responsable. Esta profesional de 25 anos, compaxina o seu labor altruísta con outros traballos sempre e cando lle é posible.

-¿Por cantos integrantes está formado o equipo que coordina?

-O equipo consta de 16 voluntarios, pero oscila entre oito e nove habituais. Cada un apúntase ao operativo que máis lle gusta, pero non sempre veñen todos. A partir do 2010, hai un grupo de sete persoas que participan sempre seguro. Teñen unha media de 20 anos e traballamos nun ambiente moi correcto. Máis vale poucos e bos que moitos e malos.

-¿Que tipo de formación posúe?

-Teño os cursos da Academia de Seguridades Públicas: prevención de riscos laborais, contra incendios, de emerxencias...

-¿Que a levou a sumarse ao voluntariado?

-O non facer nada durante unha época e ver que desde este equipo podía colaborar. Ver que podía axudar á xente, foi o que me motivou.

-¿Como é o seu día a día?

-Levántome e vou ao Concello para comprobar se hai solicitudes de preventivos. Se as hai, organizo o dispositivo cos compañeiros. Despois falo cos socorristas para saber se precisan algo ou dispoñen do material necesario. Entón, pasamos a facer unhas roldas polas praias e analizamos a afluencia de bañistas. Por último, volvemos ao centro para seguir coas tarefas de prevención se as houbera.

-¿Cambia o traballo coa chegada do período estival?

-Na tempada do verán sempre aumenta. Durante o inverno estamos pendentes do mal tempo. Estes meses dedicámonos ás praias, a vixiar o risco de incendios, accidentes de tráfico e solicitudes do Concello como dirixir o tráfico ou organizar a seguridade durante festas e procesións.

-¿Este aumento está relacionado coa visita dos turistas?

-É un dos principais motivos. Os turistas non evalúan o risco nas praias.

-¿Algún caso particular?

-O ano pasado, por desgraza, tivemos un afogamento na praia de Espiñeirido. Neste caso é unha das que están máis lonxe e o acceso é complicado. Non hai socorristas e é frecuente que rouben os aros de salvamento. Nós poñemos máis precaución aquí e en Xuño, pasamos dúas veces ao día pola súa perigosidade.

-¿E lembra algunha anécdota curiosa?

-En dous días tivemos catro visitas do helicóptero. Foi o mesmo día do afogamento en Espiñeirido. Primeiro foron alí, despois houbo un ataque epiléptico en Caveiro e máis tarde un veciño chamou ao 061 para acudir a un domicilio. Foi un ano raro.

-¿Que foi o que máis lle marcou traballando en Protección Civil?

-Participamos nos grupos de axuda do accidente ferroviario de Angrois. Fomos cinco, moitos querían ir pero non se vían capacitados. Non sabíamos o que nos atoparíamos, pero se che din que descarrilou un tren, imaxinas o peor. Non dubidei.

LAURA SAMPEDRO xefa de PROTECCIÓN CIVIL EN PORTO DO SON

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
5 votos

«Ver que podía axudar á xente foi o que me motivou»