«O encontro vén a reivindicar a conciencia de pobo de Cabo de Cruz»

Marta Gómez Regenjo
Marta Gómez RIBEIRA / LA VOZ

BARBANZA

monica ferreiros

Falta un ano, pero a maquinaria da actividade xa está en funcionamento

18 may 2014 . Actualizado a las 07:00 h.

No verán do 2015, concretamente na segunda quincena de xullo, Cabo de Cruz vaise converter nun fervedoiro de xente, ou iso é cando menos o que esperan os organizadores do Encontro de Embarcacións Tradicionais da localidade boirense. Aínda faltan moitos meses, pero a maquinaria xa está engraxándose para comezar a funcionar. Gerardo Triñanes, cabeza visible da loita pola pervivencia da carpintaría de ribeira, é o presidente do comité que ten a «enorme responsabilidade» de que todo vaia vento en popa.

-Comecemos polo principio, ¿como xurdiu a idea de presentar a candidatura de Cabo de Cruz para acoller o próximo encontro?

-Os encontros son basicamente unha festa, unha manifestación cultural coa que se pretende poñer en valor o patrimonio marítimo a través das embarcacións tradicionais. En toda Galicia hai máis de trinta tipoloxías destas embarcacións. Cabo de Cruz ten unha exclusiva, que é propia desta zona e está catalogada, é a gamela de Cabo de Cruz. E un grupo de xente tivo a idea de poñerse en contacto coa asociación Gamela para presentar a candidatura.