Emoción en Ribeira para conmemorar a II República

Duascentas persoas asistiron a un debate organizado pola Comisión pola Recuperación da Memoria Histórica


ribeira / la voz

Fartos de almorzar cada día cun novo escándalo político ou de corrupción, actualmente non é fácil mobilizar aos cidadáns para que escoiten a representantes dos partidos ou das institucións. Sen embargo, hai excepcións. O sábado tivo lugar unha en Ribeira. Co gallo da conmemoración do Día da República, a Comisión pola Recuperación da Memoria Histórica da Barbanza convidou a participar nun debate titulado Ante unha monarquía en decadencia a república como alternativa de Estado. E duascentas persoas acudiron a esta cita.

Nela, falaron representantes de tres partidos: Bieito Lobeira, por parte do BNG; Beatriz Sestayo, polo PSOE e Yolanda Díaz, de AGE. Tocáronse temas de total actualidade; a lexitimidade da actual monarquía borbónica, o futuro da mesma... E tamén se mirou ao pasado para analizar con detemento como foron as cousas coa II República ou que pasou durante a época de Adolfo Suárez. Os tres representantes políticos coincidiron en rexeitar con claridade a monarquía como modelo de representación e goberno por canto non está lexitimada polas urnas. E desexaron, os tres, un futuro republicano para España.

Sen enterros dignos

O público entusiasmouse cos temas tratados. Proba diso foi o enorme abano de preguntas feitas aos políticos e as intervencións nas que se puxo de manifesto que hai cousas que seguen causando moita dor, como o feito de non poder enterrar dignamente a persoas asasinadas durante o réxime franquista.

Realmente, o lugar elixido para celebrar o debate, o restaurante Jenaro, estaba tan ambientado que daba pé a que o público se animase. Non faltaron as bandeiras republicanas. E houbo unha intervención artística moi acaecida para o tema a tratar. O artista Che Tembra amosou esculturas alusivas á represión franquista de posguerra, sobre imaxes e textos de Castelao. Como non, xenial e ilustre rianxeiro que tanto denunciou as inxustizas, si ou si, tiña que estar moi presente no acto.

Tralo debate, houbo tamén unha cea, á que acudiron unhas cen persoas e na que se nomeou socios de honra a Xosé Alberte Lorenzo e Xoán Hermida. Igualmente, tamén se recoñeceu a labor do grupo audiovisual Sons e Visións, de Ribeira como figura republicana do ano. Precisamente, esta entidade está confeccionando un vídeo moi emotivo no que actores do grupo de teatro Airiños lle poñen voz e rostro as vítimas do franquismo. O sábado viuse un avance dese traballo; un produto audiovisual moi duro porque un escoita o que debeu pasar pola mente dos que despois acabaron mortos, asasinados en cunetas.

O documental busca honrar aos represaliados polo franquismo na comarca barbancesa. No acto había moitos familiares de persoas que sufriron estes dramáticos acontecementos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
22 votos

Emoción en Ribeira para conmemorar a II República