Barbantia deu fe de que a Bioloxía tamén é cultura

A presentación de «Ocultos» deu pé a unha amena lección de natureza


RIBEIRA / LA VOZ

Se a cultura é coñecemento, circunscribir só á creación artística a tal consideración é reducir o seu abano. E un bo exemplo do sinalado foi o acto que a Asociación Cultural Barbantia desenvolveu na galería Sargadelos de Boiro o pasado venres, unha lección de natureza a cargo de biólogos vocacionais que acudiron á chamada da entidade que preside con motivo da presentación do volume Ocultos, a cuarta entrega da colección Animales Extraordinarios da editorial Kalandraka.

Os autores da obra son Xulio Gutiérrez Roger e Nicolás Fernández. O primeiro encargouse dos textos, e o segundo, da ilustración. Gutiérrez compareceu acompañado por Jesús Lojo, director da sala Sargadelos; Agustín Agra, membro de Barbantia e mestre de Bioloxía; José María Heras, en representación da editorial, e a concelleira de Cultura, Helena Teixeira.

Foi Agustín Agra quen levou o peso da presentación e, como sempre, fíxoo ao seu estilo, debullando, primeiro, ao autor e colega de profesión, indagando nas súas teimas; e logo, coa obra, da que, entre outros aspectos, destacou a súa calidade tanto na edición como nos contidos, a maquetación e o deseño, a facilidade de lectura e a distribución de contidos.

Accesible para maiores

Pola súa banda, José María Heras, quen tamén participou na elaboración do volume, explicou que o seu papel neste traballo era facer que a publicación fose accesible tanto para nenos como para maiores. Sinalou que o primeiro obxectivo do volume era escribir textos pequenos que entenderan tanto os nenos como os seus pais. Engadiu que se buscaba que o libro fose conciso e que puidese lelo un neno de 10 anos, cousa que, ao seu parecer se conseguiu: «É, en realidade, un álbum infantil que poden ler os maiores». Destacou tamén a calidade das ilustracións de Nicolás Fernández, que non puido comparecer.

O autor, que coordina a sección Palabras na Paisaxe do suplemento A Voz de Barbantia, dixo que Ocultos é froito de moitos anos de traballo. Xulio Gutiérrez lembrou que a obra forma parte dunha colección de seis volumes, redactados con sinxeleza para que sexan libros de lectura universal, accesibles en todo o mundo, motivo polo que se inclúen animais de todos os continentes: «Ocultos é un libro no que tratamos de reflectir os enganos dos animais para comer e para non ser comidos». As publicacións desta colección están traducidas ao inglés, alemán e ao portugués.

Pechou o acto a concelleira de Cultura, Helena Teixeira, felicitando ao autor pola súa obra e a Barbantia pola labor cultural e a publicación do suplemento.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
1 votos

Barbantia deu fe de que a Bioloxía tamén é cultura