O novo recompilatorio de A Voz de Barbantia presentarase en Outes

Este terceiro volume recolle os 25 suplementos culturais publicados no xornal entre o 29 de xaneiro do 2010 e o 25 de maio do 2012


Ribeira / la voz

Con prólogos do presidente de Barbantia, Xesús Laíño, e do delegado de La Voz de Galicia en Barbanza, Moncho Ares, o venres presentarase en Outes o terceiro recompilatorio do suplemento cultural A Voz de Barbantia. Trátase dun volume que recolle, de xeito íntegro, os traballos publicados no xornal entre o 29 de xaneiro do 2010 e o 25 de maio do 2012. É dicir, os correspondentes aos números comprendidos entre o 51 e o 75.

Ao igual que aconteceu cos dous anteriores -o primeiro recompilatorio foi editado por La Voz de Galicia no 2007-, este volume chegará aos lectores nunha reprodución facsímile. En total, son 110 páxinas nas que figuran as colaboracións gráficas e escritas que saíron mensualmente.

La Voz de Galicia e Barbantia darano a coñecer no acto mensual que terá lugar, ás 20.30 horas, na casa da cultura de Outes. A portada está inspirada nos debuxos da sección Convidados e a composición é obra de Vexota. Os lectores poderán gozar así das distintas seccións das que consta A Voz de Barbantia: Convidado, A Historia, O Lector, Os Escritores, A Voz da Terra, Palabras na Paisaxe, O Andel, En Obras, As Letras da Arte, Acasos e O Fío de Ariadna.

Os coordinadores do suplemento son Manuel Cartea, Moncho Ares e Pastor Rodríguez. Ademais, cada sección ten unha persoa encargada, correspondendo este labor a Antón Riveiro, Manuel Mariño del Río, Encarna Pego, Isabel Santos, Xulio Gutiérrez, Román Arén, Xosé R. Losada e Pedro García Vidal, Manuel Cartea e Xoán Pastor Rodríguez.

O aniversario

Este terceiro recompilatorio coincide co 25 aniversario da edición de La Voz de Barbanza, aspecto ao que alude no prólogo o delegado, que indica que se trata dun detalle que ten unha relación estreita con A Voz de Barbantia porque foi nas páxinas de La Voz de Galicia dedicadas á comarca onde se puxo a semente do suplemento da man dos colaboradores.

Precisamente, ao traballo conxunto alude o presidente de Barbantia no seu escrito, no que define o suplemento mensual coma un punto de encontro de artistas e lectores, un equilibrio entre a experiencia e a aparición de novas voces.

Esta publicación iniciou a súa andaina en xaneiro do 2005 co obxectivo de ser unha mostra da cultura da comarca, dando espazo a novos creadores e a outros de consolidada traxectoria. A Voz de Barbantia é unha porta aberta ás novas manifestacións artísticas e literarias barbancesas.

Como indica no prólogo Xesús Laíño, é unha «lembranza do pasado, acta do presente, semente do futuro». Laíño tamén indica que este é o camiño no que se continuará, con ilusión e perseveranza.

Venta ao público

Despois da presentación, nunha data que será concretada, o recompilatorio de A Voz de Barbantia será distribuído por La Voz de Galicia e poderá adquirirse ao prezo de 2 euros.

Como ven sendo habitual cada fin de mes, o venres darase a coñecer e repartirase o suplemento, neste caso o número 79. De igual xeito, o encontro cultural previsto en Outes irá acompañado da presentación de dúas obras: Tonas de laranxa, de Manuel Lorenzo Baleirón e María Lorenzo Miguéns, e Iria, de Anxo Angueira.

No acto estarán presentes, amais dos autores, o director de Xerais, Manuel Bragado; o vicepresidente de Barbantia, Manuel Cartea; o mandatario de Outes, Carlos López Crespo, e o delegado de La Voz de Galicia en Barbanza, Moncho Ares.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
2 votos

O novo recompilatorio de A Voz de Barbantia presentarase en Outes