«Debemos apostar todos pola viabilidade da planta de Servia»

Un dos seus principais obxectivos é acabar cos conflitos entre a empresa FCC e a mancomunidade, que cre que prexudican a todos


ribeira / la voz

luis Oujo pouso presidente da mancomunidade serra do barbanza

«Carnota foi o único concello que solicitou que se rebaixase o servizo de recollida»

Dende primeiros de ano, Luis Oujo Pouso, rexedor de Porto do Son, é o presidente da Mancomunidade Serra do Barbanza. Nos últimos tempos, moitos foron os conflitos aos que tivo que facer fronte a entidade. Un dos máis importantes é o que atinxe ás relacións entre este ente supramunicipal e a empresa adxudicataria da xestión da planta de Servia e da recollida do lixo, Fomento de Construcciones y Contratas (FCC). A resolución destas diferenzas é unha das prioridades para Luis Oujo, quen fala da necesidade de «buscar o consenso».

-¿Como ve o futuro da mancomunidade?

-Hai que arranxar varias cousas, pero son optimista. A planta de reciclaxe é un referente a nivel nacional, e hai vicios creados que deben resolverse. Non imos deixar que morra a planta de Servia.

-As melloras ás que alude suponse que están directamente vinculadas á relación da mancomunidade con FCC.

-Neste momento téñenos metidos cinco procesos xudiciais. Eu non sei se isto foi debido á falla de diálogo, o que si teño claro é que as cousas, así, non funcionan. Debemos apostar todos pola viabilidade da planta de Servia. A nosa intención é que a FCC e á mancomunidade lles vaia ben, e supoño que a empresa está interesada en seguir coa xestión.

-¿Algunha desas demandas é especialmente delicada?

-Unha delas é a reclamación duns seis millóns de euros pola denominada autorización ambiental integrada. Se a resolución xudicial fose negativa para a mancomunidade, estaría en cuestión a súa viabilidade. Hai outros asuntos que estamos analizando en profundidade, como é o caso da modificación do servizo polo incremento dos puntos de recollida. Estamos mirando que porcentaxe de incremento houbo dende que se concertou con FCC.

-Tamén está o asunto de Ecoembes, porque o acordo ao que chegou a entidade non é aceptado por FCC.

-A empresa di que ese 80% de recollida de envases lixeiros e plásticos é insuficiente. Sen embargo, no contrato tamén se establecen unhas toneladas a recoller e pode que ese 80% se converta nun 100%. Explícome, agora estase erradicando o uso de bolsas de plástico nos supermercados e, incluso, algúns só teñen recipientes biodegradables, feitos de materia orgánica, para levar a compra, estes últimos xa non contan como plástico. A nosa intención é buscar o consenso. Se nos denunciamos uns a outros só conseguimos que a planta non sexa viable.

-Serra do Barbanza tamén ten a súa responsabilidade, porque os pagos non están ao día.

-A mancomunidade ten unha débeda importante con FCC, máis de tres millóns de euros, e queremos que os concellos paguen. Está claro que nós tamén debemos cumprir cos nosos compromisos coa empresa. Non podemos ter un servizo e non pagar. Hai un acordo coa Xunta para que se reteñan os cartos aos concellos que non contribúan coa súa parte e estamos sendo rigorosos.

-Hai uns meses falárase de reducir o servizo para poder afrontar mellor a situación.

-No contrato existe unha cláusula que di que cada concello pode reducir un 20% o servizo de recollida. Polo momento, Carnota foi o único membro da mancomunidade que solicitou que se rebaixase a prestación. Ao parecer, a súa situación económica é bastante complicada. Este asunto deberá abordarse na vindeira asemblea. Polo momento o servizo vense mantendo como se fixo ata agora.

-Falou antes das débedas coa empresa concesionaria, ¿cantos concellos están ao corrente de pago?

-Polo momento, Noia e Porto do Son. Sen embargo, como xa indiquei, hai tempo que se veñen tomando medidas neste asunto e pretendemos que a situación de todos se regularice.

-Vese que, ao igual que garantir a viabilidade da planta, saldar a débeda é outra das súas inquedanzas.

-Dende logo. O meu propósito é poñer todo ao día no relativo aos pagos, evitar os preitos coa empresa e que todo funcione o mellor posible.

-¿Como son as relacións co comité de empresa?

-Son boas. Intentamos, aínda que é un aspecto que é competencia da empresa e no que nós non podemos meternos, que non haxa redución de persoal. No que podamos faremos o posible, aínda que está claro que esas son cuestións que atinxen directamente á empresa concesionaria.

«Nós tamén temos que cumprir cos nosos compromisos coa empresa»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos

«Debemos apostar todos pola viabilidade da planta de Servia»