Como Susana García desborda optimismo, móstrase convencida de que o peor xa pasou e confía en «non ter que volver a adoptar medidas drásticas». De feito, prefire falar do futuro coa vista posta nos programas en marcha e nos proxectos.
-Hai unhas semanas estreouse unha curta feita por usuarios da Creba que forma parte dun programa que denominan de antiestigma, ¿cal é o obxectivo?
-Do que se trata é precisamente de cambiar a visión que a xente ten das persoas que sofren unha enfermidade mental. Moita xente cre que aqueles que teñen un problema deste tipo son violentos, por iso pensamos que é preciso actuar neste eido. Coa curta, titulada Ramón e Xulia, conseguimos estar na rúa, publicitarnos, e iso fai tamén que a xente se involucre con nós, de feito vimos aumentado o número de voluntarios.
-¿Cambiar esta percepción que ten a sociedade dos enfermos mentais é o gran reto da Creba na actualidade?
-É un deles, porque consideramos que o das enfermidades mentais é un problema de todos, pero a integración laboral e a inserción social son eidos nos que hai que incidir.
-¿Para cando as novas instalacións de Ribeira?
-Están a piques de seren inauguradas. Desde elas queremos involucrar á xente de Ribeira e dos municipios limítrofes. Alí imos montar un centro de día, un obradoiro ocupacional e, co tempo, pisos protexidos. A maiores, de cara ao Nadal, teremos puntos de venta de produtos no Campo de San Alberto e nos institutos de Boiro.