«Móvenme as emocións e plásmoas mediante o colorido»

A artista, que expón a súa obra na casa de cultura sonense destaca a capacidade do mar para transmitir sensacións


ribeira / la voz

Inés Abad iniciouse, fai vinte anos, no mundo pictográfico da man dun pequeno taller de pintura. A súa carreira dedicouna a estudar a especialidade de deseño de interiores así como tamén abrangueu o deseño gráfico e o ámbito da publicidade. Pese a todo, a súa verdadeira paixón é a pintura en óleo. Mostra disto é a recente exposición que ofrece no Concello de Porto do Son, onde segue a manter o seu trazo máis característico: o uso dunha liña intimista plasmada sobre o lenzo.

-¿Que se ofrece na súa última mostra pictórica?

-Nesta última exposición hai unha secuencia de diferentes e variados puntos de vista marítimos aínda que tamén trato, pero minimamente, o tema figurativo. Xogo moito co uso do colorido dunha mesma gama cromática, usando máis a brocha que o que é o pincel en si, porque considero que da máis representación ó cadro. Por isto, o que en maior medida se vai a ver son temas costumistas, propios de Galicia, que ademais aquí, en Portosín, enlazan moi ben.

-Os temas marítimos, imaxes de barcas e rías, sempre son moi recorrentes nos seus cadros...

-O mar e a montaña son temas que me apaixonan, tanto pintar todo o que teña que ver co marítimo como coas paisaxes de interior. Neste caso a temática, ó ir de acordo coa vila costeira na que se expón, é basicamente de mar aínda que tamén os hai portuarios. Ademais, esta vez fixen moito uso do esmalte e noutros, aínda que menos número, usei o óleo.

-¿Que alberga o mar que lles inspira a todos os pintores?

- Pois, por explicalo dunha maneira moi simple, pero que é a realmente correcta, para min o mar é como a vida mesma. Eu no mar é onde atopo o reflexo do sentimento de tranquilidade, da sensación de reflexión. O mar chega a transmitirme as distintas situacións que se dan na realidade: a vida cotiá, a serenidade... é todo aquilo que podo proxectar na vida, no meu día a día. Ademais, eu pretendo escapar sempre do urbanismo para trasladarme a paisaxes onde creo que me podo atopar a gusto realmente e eu, esa esencia, atópoa no mar e no mundo rural.

-Ademais, as súas imaxes sempre son moi simples ¿isto é en beneficio do seu público ou seu?

-Non, non quero ser egoísta pero eu non penso no espectador, nun primeiro momento. Polo que me guío eu, primordialmente, son polas primeiras sensacións. A emoción que teña nun determinado momento ou o recordo que me chegue de vivencias e experiencias pasadas. Son cousas que precisas plasmar en momentos precisos e claves, pasando a ser o visitante a persoa que saca logo as súas conclusións ao velo. Este non se queda sen participar, tamén o fai. Eu pinto o que considero destacable nun intre e logo será el o que quite conclusións ao velo.

- ¿Opta por mesturar sempre o real co abstracto?

-Si, a min o que me move moito son as sensacións. Móvenme as emocións e plásmoas mediante o colorido, con diferentes tonalidades. Cada gama cromática pode xerar un sentimento distinto, en cada persoa, polo que eu non lle chamaría pintar en abstracto senón pintar usando o expresionismo.

-Entón ¿en abstracto puro nunca se plantexou pintar?

- Non, nunca. Pintar totalmente en abstracto, en abstracto puro, é algo que non me motiva nin me interesa.

-¿E mudar de estilo? ¿Cambiar, por exemplo, o óleo e pasarse á fotografía?

-Non, eu realmente estudei deseño de interiores e márketing afincado no ámbito da publicidade como, por exemplo, nas imaxes corporativas dunha empresa, pero son temas que se compaxinan sen ter que chegar a tomar a decisión ou a medida de cambiar totalmente de ámbito. Quizais como xa uso outras técnicas para estas labores sexa polo que non me chama mudar de ámbito no resto de facetas, na pintura.

-¿Non son estes dous ámbitos de traballo moi dispares aos que dedicarse?

-Para min non. Son distintos á hora de compaxinalos pero a súa relación atópase na proximidade que albergan, a de estar sempre traballando. Claro que non é o mesmo elaborar unha marca que pintar un cadro pero ao fin e ao cabo é sempre estar creando. Estou sempre a imaxinar, plasmar e aportar sentimentos e ideas para terceiros.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

«Móvenme as emocións e plásmoas mediante o colorido»