«Na prédica de Cristo non hai unha crítica á homosexualidade»


ribeira / la voz

Saltou á palestra hai xa quince anos, pola súa vinculación coa Mesa Pola Normalización Lingüística. Primeiro, como responsable barbancés desta asociación e, desde o 2002, como presidente. A defensa do idioma foi sempre o selo de identidade de Carlos Callón e así se reflectiu nas súas publicacións. Pero agora ven de rachar con esa tendencia, sacando á luz Amigos e sodomitas, unha investigación sobre a configuración da homosexualidade na Idade Media. Un libro que fixo a este ribeirense valedor do premio Vicente Risco de ciencias sociais.

Precisamente, á hora de elixir un recuncho, Carlos decántase por una escenario vinculado a esta obra, a igrexa de San Paio de Carreira: «Un dos capítulos do libro está precisamente dedicado á historia deste santo, que foi asasinado no século X por non querer deitarse cun califa de Córdoba. É moi interesante porque a súa historia permite ver a evolución do concepto de sodomitas».

Aínda que o libro ven de publicarse, Callón xa levaba anos traballando no tema: «Comecei estando na universidade, animado polos mestres, que se sorprendían dos resultados da investigación e logo polos propios descubrimentos que ía facendo. Atopei por exemplo unha cantiga amatoria entre dous homes da lírica medieval galega».

O ribeirense recoñece que ver como a historia da homosexualidade e de Galicia fora falsificada foi o que o impulsou a seguir adiante no seu complexo traballo: «Chama a atención que na prédica de Cristo non hai unha crítica á homosexualidade e, como pecado, non existe nos mil primeiros anos de cristianismo».

Posición da igrexa

Neste sentido, Carlos Callón vai máis alá e lanza unha pregunta: «¿Como chegamos ao punto de que a igrexa se preocupe máis porque dous homes ou dúas mulleres se deiten xuntos que porque os bancos practiquen a usura? Hai mil anos non era así». El mesmo apunta como resposta á instauración dos estados absolutistas: «A sodomía empregábase, cando non había outros argumentos, como arma de deslixitimación».

Aínda que o éxito de Amigos e sodomitas está a ser case abafador, e o propio Carlos asegura que o tería publicado hai varios anos se non fose polo tempo que lle resta a presidencia da Mesa, o autor ribeirense volverá ás súas orixes na próxima publicación. Trátase dun libro de sociolingüística que verá a luz a finais deste mesmo mes baixo o título Como defender os teus dereitos lingüísticos. É unha especie de manual de autoaxuda sobre como pode vivirse o día a día en galego para tratar así de escribir o futuro do idioma.

Seguir escribindo e regresar ao ensino, a súa vocación, son os proxectos futuros deste ribeirense que asegura ter claro que a súa corta etapa como concelleiro é auga pasada: «Non teño pensado volver á política institucional».

Carlos Callón

32 anos

Mestre e escritor

A igrexa de San Paio de Carreira: «Un dos capítulos do meu último libro está precisamente dedicado á historia deste santo»

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
9 votos

«Na prédica de Cristo non hai unha crítica á homosexualidade»