«A festa da filloa é posible pola implicación de todo o pobo»


ribeira / la voz

Un grupo de veciños da aldea sonense de Miñortos uníronse hai uns anos para poñer en marcha unha asociación. O obxectivo era dinamizar o lugar con actividades de carácter lúdico e festivo. Á fronte do colectivo púxose Víctor León, quen fai un balance positivo do traballo realizado, pois van xa pola sétima edición da Festa da Filloa, que se vai celebrar este sábado; e pola terceira exaltación da tortilla, que terá lugar o vindeiro día 26.

-Está claro que a da filloa é xa a festa estrela de Miñortos, ¿como xurdiu esta idea?

-Buscábamos unha festa na que puideran implicarse todos os veciños e foi así como xurdiu a idea de facer a exaltación da filloa.

-¿De que maneira colaboran os veciños nesta actividade?

-O propio sábado vai haber unha persoa na carpa facendo filloas, pero hai veciños que empezarán hoxe a traballar na casa, preparando a masa para, mañá pola mañá, facer as filloas e levalas á festa. Hai unha ducia de persoas implicadas.

-¿É posible calcular o número de filloas que se van poñer a disposición do público?

-É complicado, o que si podo dicir é que se van empregar cen quilos de fariña e tres enormes caixas de ovos. O ano pasado había máis de mil filloas. A maiores, imos repartir tamén flores e orellas.

-E nun par de semanas, a degustar tortilla. ¿Por que se decantaron por este prato?

-Neste caso, o que se buscaba nun principio era involucrar aos locais hostaleiros, que fosen eles os que concursaran. Logo decidimos darlle tamén aos particulares a oportunidade de participar.

-¿Como é o proceso?

-Hai dúas categorías, unha para negocios e outra para particulares. Nos dous casos, teñen que presentar tres tortillas, dúas son para a degustación aberta a todo o público e unha, para o xurado. Todos aqueles que desexen participar no concurso poden inscribirse xa no número de teléfono 696 887 927.

-¿Conseguiron con estas actividades dinamizar a aldea?

-Penso que logramos que a aldea de Miñortos sexa máis coñecida, tanto en Barbanza como fóra da comarca. A festa da filloa soa xa en moitos lugares.

-¿Non é complicado, sobre todo tendo en conta o pequeno que é o núcleo de Miñortos, organizar actividades deste calibre?

-Neste tipo de festas sempre hai complicacións, pero hai que ter en conta que a festa da filloa é posible pola implicación de todo o pobo de Miñortos. Os veciños colaboran ao máximo, senón fose así, isto acabaríase. Tamén contamos coa axuda do departamento de Cultura do Concello de Porto do Son.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
3 votos

«A festa da filloa é posible pola implicación de todo o pobo»