A responsable do club de xubilados anima a todos os veciños a acudir á exposición de traballos manuais que se inaugurará esta tarde
10 sep 2010 . Actualizado a las 02:00 h.Gloria Lijó Cacharrón é unha ribeirense nada en Castiñeiras que, dende o pasado mes de xaneiro, está á cabeza da directiva do centro da terceira idade Santa Uxía. Durante a súa estadía no posto, está tratando de ampliar o número de actividades para os socios, propoñendo novas iniciativas.
-¿Que tipo de actividades fan no centro social?
-Facemos un montón de cousas. Durante o fin de semana temos un bingo e partidas de cartas. Tamén organizamos charlas e talleres. Este ano tivemos cursos de manualidades e pintura. Unha vez ao ano facemos ceas, excursións... en fin, quen é socio do noso centro non ten tempo para aburrirse.
-¿Cal é a actividade que ten mellor acollida?
-Sen dúbida, as excursións, hai moita xente que se anima. Despois, dos talleres, á xente gústalle moito o de pintura. Penso que esta é a actividade preferida.
-¿A onde viaxaron este ano?
-Fomos a Lurdes, á festa da Historia de Ribadavia, a San Andrés de Teixido, a Santander, a San Sebastián, a Santillana del Mar... en definitiva, a un montón de sitios. Queremos facer que os socios saian da casa e que se entreteñan visitando sitios.
-Respecto ás últimas iniciativas, ¿que subliñaría?
-Hai pouco tivemos varias xornadas con charlas de temática diversa, un día veu o párroco de Ribeira a falar de relixión e noutra ocasión viñeron varios especialistas do Hospital da Barbanza a falar de hábitos saudables.
-¿Que proxectos teñen na asociación?
-Esta mesma noite imos inaugurar unha exposición no centro social da terceira idade. Nela exhibiranse os traballos realizados polos socios nestes últimos meses. O acto de apertura farase despois da misa das oito e media. Despois, a mostra poderá ser visitada en horario de 12.00 a 14.00 horas e de 17.00 a 21. 00 horas ata o vindeiro martes.
-¿De onde xurdiu a idea de organizar esta exposición?
-Tivemos tres voluntarias que nos viñeron a dar clase de manualidades, gancho e calceta. Nestes cursos participaron 15 socios, e vistos os orixinais resultados, animámonos a facer algo nas festas da patroa da cidade.
-¿Que pezas se verán?
-Poderanse ver lámpadas vellas reparadas, marcos de fotos, xoieiros, centros florais, patucos, chaquetiñas e outras cousas feitas a gancho e calceta. Dende a asociación estamos moi ilusionados con este proxecto, por iso queremos que o público acuda á nosa exposición, que poidan vela enteira.
-¿Cal é o perfil de socio?
-En xeral, xente retirada, entre os que a maioría son mulleres, pero tamén temos algún socio que aínda non chegou á idade de xubilación, por exemplo, eu apunteime non estando retirada e miña filla tamén está anotada. Eu animo a todo o mundo a vir e facerse socio, para evitar a rutina e o aburrimento.
-¿Que fai falla para facerse socio?
-Achegarse ao local e traer dúas fotos e unha fotocopia do carné. Ademais diso, hai que pagar unha taxa de 12 euros anuais, que se reduce a 10 euros para a xente viúva e solteira.
-¿Que é o mais positivo de pertencer ao club de xubilados?
-Eu penso que a xente que vén aquí ten menos problemas de depresión. No centro temos un ambiente moi bo, somos como unha gran familia. Creo que é moi beneficioso para os maiores saír da casa e non pasar horas en solitario, sen ningunha compañía. Os socios pasan o día en activo, facendo actividades de todo tipo... e iso sempre esperta a un.