Darío Xohán Cabana achegou a figura de Uxío Novoneyra aos estudantes ribeirenses
BARBANZA
O escritor Darío Xohán Cabana estivo onte en Ribeira. Sen embargo, non o fixo para falar da súa obra, senón para achegar aos estudantes de Ribeira a unha das grandes plumas da literatura galega, o home do Courel ao que este ano se lle dedica o Día das Letras Galegas, é dicir, a Uxío Novoneyra.
Para escoitar a Cabana, ata o auditorio de Ribeira acudiron alumnos de secundaria dos centros de Aguiño, Palmeira, Castiñeiras e Oleiros, así coma os de O Grupo e o Galaxia, ambos en Santa Uxía.
Esta actividade adscríbese dentro do programa chamado Maio Cultural, que organizaron as concellerías de Educación e Cultura de Ribeira. No marco desta mesma iniciativa, hoxe o auditorio dará cabida a unha nova conferencia. Trátase dunha charla na que Antón Lopo falará da biografía novelada que fixo sobre Uxío Novoneyra.