A remodelación da fachada marítima sonense


O alcalde de Porto do Son dedícase a traballar, cousa que dubida que fixese o señor Tomé, porque se traballase ou fixese as cousas como é debido, non pasaría o que pasa con Portos de Galicia. E este alcalde quere facer público por que non o recibe o presidente de Portos e por qué o señor Tomé di o que di, ocultando a verdade. E a verdade é esta:

En febreiro do 2009, gobernando a coalición PSdeG-PSOE/BNG na Xunta, asinouse un convenio entre o Concello de Porto do Son, representado por Tomé Piñeiro, e o presidente de Portos de Galicia, Jacinto Parga Fernández, para a execución e mantemento das obras de remodelación do bordo interior de Porto do Son. As obras custarían 3.261.013'59 euros e deberían executarse en 16 meses. Un notable investimento para Porto do Son, o que demostra que o goberno bipartito non tiña en conta a cor política dos concellos á hora de facer inversión. Pero o goberno actual do PP non se molesta sequera en explicarlle ao actual goberno do Son que está a pasar con este proxecto.

¿E que está a pasar? Pois algo incrible. Tras asinar o convenio con Portos o 17 de febreiro do 2009, ao «intelixente» de Tomé Piñeiro non se lle ocorre outra cousa que, xa en fase de adxudicación, pedir a modificación ou redefinición dese proxecto o 20 de xullo do 2009. Consecuencia: probable revogación do investimento, supresión do proxecto e perda de máis de tres millóns de euros para Porto do Son. Estes son os feitos que o presidente de Portos de Galicia non quere dicirnos, quizais para non amosar que tipo de xestor era o ex alcalde do PP do Son, Tomé Piñeiro.

Pero este alcalde sabe que o seu deber é aclarar este asunto e seguirá a insistir con Portos de Galicia ata clarificar o que realmente pasou. Este goberno espera que o proxecto para Porto do Son non se revogue e o investimento asinado en convenio se realice para o beneficio de todos os veciños e veciñas do Son.

Non conforme con semellante despropósito, o PP e Tomé, para tapar o desaguisado, atrévense a propoñer en moción unha comisión de traballo sen especificar literalmente para que (nin mocións saben presentar), pero que supoñemos é para a remodelación do proxecto da fachada marítima do Son. O que este goberno quere saber é, por boca do presidente de Portos de Galicia, cal é a situación do proxecto, se o investimento se vai realizar con garantías ou se o sectarismo e o fanatismo político do PP van privar a Porto do Son e aos seus veciños e veciñas dunha actuación concedida aproveitando a ineptitude de Tomé, que cun goberno en minoría e sen permiso da corporación municipal, pediu a modificación do proxecto, que previamente el mesmo atopou correcto cando o asinou o 17 de febreiro e que logo non lle gustou.

Por todo isto, ¿onde está a demagoxia? ¿Quen engana aos seus veciños? ¿Quen os priva dos investimentos que tanto traballo custou conseguir?.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
6 votos

A remodelación da fachada marítima sonense