Un cento de coches participaron na caravana a prol da lingua convocada pola Plataforma Queremos Galego
BARBANZA
Unha sonada caravana foi a fórmula elixida pola Plataforma Queremos Galego do Barbanza para manifestar o seu desacordo co decreto da lingua autóctona e o seu uso no ensino. Preto dun centro de vehículos acudiron o sábado pasado á chamada do colectivo e participaron nunha protesta que percorreu os catro municipios de Arousa norte e que se fixo notar polos bocinazos dos coches participantes.
Portando bandeirolas co logotipo da plataforma e facendo tocar as bucinas dos vehículos, a caravana partiu de Rianxo e chegou a Ribeira nun acto co que os convocantes quixeron deixar claro que a proposta da Xunta sobre o idioma «vai contra a lingua galega».
En Santa Uxía o ruído dos coches cesou para dar paso á lectura dun manifesto a cargo dos voceiros de Queremos Galego na comarca barbancesa, o escritor Carlos Mosteiro e a cantante Sonia Lebedinsky. No seu discurso, animaron á cidadanía da bisbarra a manifestar o seu desacordo co decreto do galego.
Tamén participou no acto de protesta Carlos Callón, presidente da Mesa pola Normalización Lingüística, que da «covardía» do goberno de Núñez Feijoo «ao facer público o decreto o día de fin de ano.
Foron moitas as personalidades que se sumaron á protesta, entre elas o alcalde de Boiro, Xosé Deira, a deputada Rosana Pérez e as voceiras do BNG en Rianxo e Ribeira.