Premio ás mellores imaxes

O santiagués José López Pérez fíxose co primeiro galardón do certame fotográfico do centro de Neixón


A cuarta edición do certame fotográfico Imaxes do pasado ao presente , organizado polo Centro Arqueolóxico do Barbanza, xa ten gañadores. Os membros do xurado reuníronse o pasado fin de semana para analizar as corenta obras que se presentaron e o museo deu a coñecer onte a identidade dos premiados. Na categoría de adultos, o primeiro galardón foi parar a mans de José López Pérez, de Santiago, pola instantánea Imaxe virtual .

O fotógrafo compostelán levarase un premio de 250 euros por unha obra en cor na que pode verse o reflexo do faro de Corrubedo na auga.

Nesta mesma categoría, o segundo premio foi para o veciño de Cabo de Cruz Jesús María Torrado Vidal, que o ano pasado resultara gañador do certame. O boirense, que recibirá 125 euros, obtivo o galardón coa obra Hórreo . Trátase dunha instantánea en cor na que aparece unha leira de millo cunha planta en primeiro plano e, en segundo, un hórreo. A instantánea foi tomada en San Pedro de Bealo.

No colectivo xuvenil, o primeiro premio foi para Raquel Lomba Santiago, da localidade muradá de Louro, que será galardoada con 120 euros. A obra coa que concorreu ao certame titúlase Moendo a pares , e nela pode verse o interior dun dos muíños de Brazos. O xurado do certame decidiu deixar deserto o segundo posto desta categoría.

Por segunda vez

Ao igual que ocorrera o ano pasado, o veciño de Cabo de Cruz Jonathan Torrado Cespón fíxose co primeiro galardón no colectivo infantil. A instantánea que presentou, Cruceiro de Cespón , foi tomada no atrio da igrexa de San Vicente de Cespón. O boirense levará 65 euros e tres libros da colección Os barbanzóns .

Tamén se fará con outros tres exemplares, ademais de 35 euros, o veciño de Boiro David Enríquez da Palma, que obtivo o segundo premio na categoría infantil. A súa obra, Natureza , reproduce de xeito singular a fonte da serea situada no parque da Cachada.

O xurado que se encargou de examinar os traballos estivo composto pola concelleira Natalia Laíño, que substituíu ao edil de Cultura, Gerardo Piñeiro; polo presidente da asociación de veciños de Neixón, Ricardo Herbón; polo ilustrador e deseñador gráfico Manuel Silva e polo operador de cámara Juan Piñeiro.

A Concellería de Cultura de Boiro agradece a participación no certame e o intereses amosado polas persoas que presentaron os seus traballos fotográficos.

Conoce toda nuestra oferta de newsletters

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Votación
0 votos

Premio ás mellores imaxes