Ravella contrata servizos de mantemento nos colexios de Vilagarcía por valor de 22.300 euros

O Concello de Vilagarcía amplía o plan de mantemento dos centros educativos que desenvolve cada verán. Este ano realizaranse tres obras máis de mantemento e conservación. A Xunta de Goberno local contratou onte as actuacións, cun orzamento de 22.358 euros, que consistirán na limpeza, reparación de fendas e pintado de fachadas nos colexios de Rosalía de Castro e Arealonga, así como na mellora do patio da Escola Municipal de Música.

Reformas Trébol é a empresa encargada de acondicionar os muros exteriores e os aleiróns de Arealonga, visiblemente deteriorados. Tamén actuará no zócolo, que presenta fendas polas que entra humidade, así como nos traballos de lavado de paredes, selado de fendas, desatasco de sumidoiros e pintado con clorocaucho, cun investimento de case 9.500 euros.

Por outra parte, esta empresa tamén executará a limpeza, o tapado de fendas, o borrado de grafitis e o remate con pintura plástica para exteriores da fachada do colexio do Carril, cun prezo de 8.107 euros. No caso da Escola Municipal de Música, a empresa encargada é Garocaprim, que adecuará o patio co obxectivo de resolver as deficiencias que presenta, garantindo a seguridade do alumnado. Os traballos consisten na extensión dunha capa de formigón e na execución das xuntas de dilatación, completando o orzamento con 4.813 euros.

Estas intervencións súmanse ás que o Concello executa, dende o mes de xuño, en todos os centros educativos de infantil e primaria, no marco dos labores habituais de mantemento. Estas actuacións iranse completando durante o mes de agosto, de cara a que estean listas para o inicio do curso.

---

---

---