O goberno local de Vilagarcía critica o PP por «crear falsas polémicas» coa obra de Bouza de Abaixo
VILAGARCÍA DE AROUSA
Desde Ravella atribúen as críticas da formación conservadora aos seus nervios ante a proximidade das eleccións municipais
05 jul 2026 . Actualizado a las 05:00 h.Un día tardou o goberno de Vilagarcía de Arousa en contestar a solicitude de explicacións do PP sobre a marcha das obras que o Concello está a acometer na rúa vilaxoanesa de Bouza de Abaixo ante a preocupación que, di a formación conservadora, lle terían trasladado moitos veciños pola próxima finalización dos traballos sen que se teñan soterrado a redes de telefonía e doutros subministros. Desde Ravella acusan o PP de «crear falsas polémicas para tapar o bo ritmo que leva a obra e as melloras que suporá para os seus habitantes», que atribúe aos seus nervios ante a proximidade das eleccións municipais.
O goberno local do PSOE sinala que Bouza de Abaixo xa contaba con canalizacións para as telecomunicacións e que agora se instalaron as da electricidade. Tamén que se mudaron as tomas de auga ás vivendas.