Martín Rey brilla no Campionato de España en ruta e remata no posto 16

O vilagarcián do Burgos Burpellet BH, Martín Rey, foi un dos animadores e protagonistas da última edición do Campionato de España en ruta, disputada o domingo na localidade oscense de Sabiñánigo. Con máis de 200 quilómetros de percorrido pola provincia de Huesca, Martín Rey aproveitou a súa liberdade de movementos para entrar nunha fuga dunha ducia de corredores nun dos múltiples ataques que se sucederon á fronte do pelotón.

Neste grupo, o arousán conseguiu unha importante renda en cabeza de carreira, ata que na penúltima volta ao circuíto trazado pola Real Federación Española de Ciclismo o grupo se partiu en dous e Martín Rey quedou atrás no segundo paquete a 45 quilómetros do final. O de Vilagarcía de Arousa acabaría sendo alcanzado polos seus compañeiros no Burgos Burpellet BH José Manuel Díaz e García Pierna, que rodaban no seguinte grupo perseguidor. O primeiro deles atacou no último bucle do percorrido e conseguiu finalizar sétimo, con Jesús Herrada décimo cuarto e con Martín Rey asinando un sobresaínte décimo sexto posto en meta.

---

---

---